شیعہ عالم دین مقتدیٰ الصدر کا سیاست سے علیحدگی کا اعلان، حامیوں کا ریپبلکن پیلس پر دھاوا

By admin On اگست 29, 2022

شیعہ عالم دین مقتدیٰ الصدر کے سیاست سے علیحدگی کے اعلان کے بعد ہزاروں مشتعل مظاہرین ریپبلکن پیلس میں گھس گئے ہیں۔

غیر ملکی خبر رساں ادارے کے مطابق عدم استحکام کے شکارعراق میں بااثر شیعہ عالم دین مقتدیٰ الصدر کے ہزاروں حامی بغداد کے قلعہ بند گرین زون میں واقع کمرشل عمارت ریپبلکن پیلس میں گھس گئے ہیں۔

رپورٹ کے مطابق ہزاروں مشتعل مظاہرین مقتدیٰ الصدر کے سیاست سے علیحدگی کے اعلان کے بعد ریپبلکن پیلس میں گھسے ہیں جب کہ آرمی نے مقامی وقت کے مطابق بغداد میں سہہ پہر تین بجے سے کرفیو لگانے کا اعلان کیا ہے۔

رپورٹ میں کہا گیا ہے کہ کرفیو کے دوران گاڑیوں اور شہریوں کی نقل و حرکت پر مکمل پابندی عائد کی گئی ہے۔

رپورٹ میں یہ بھی کہا گیا ہے کہ مقتدیٰ الصدر کے سیاست سے علیحدگی کا اعلان ملک میں مزید عدم استحکام پیدا کرسکتا ہے جب کہ ان کے شیعہ حریفوں کے درمیان حالیہ ڈیڈلاگ کی وجہ سے ملک لمبے عرصے سے بغیر حکومت کے چل رہا ہے۔

واضح رہے کہ شیعہ عالم دین مقتدیٰ الصدر نے ٹوئٹر پر سیاست سے دستبرداری کا اعلان کرتے ہوئے لکھا تھا کہ ’میں سیاست سے اپنی حتمی دستبرداری کا اعلان کرتا ہوں‘۔

علاوہ ازیں انہوں نے اپنے ساتھی شیعہ لیڈران پر اصلاحات کی کال پر کان نہ دھرنے پر انہیں تنقید کا نشانہ بنایا تھا جب کہ ساتھ ہی انہوں نے تنظیم کے ثقافتی اور مذہبی ادارے کھلے رکھنا کا بھی اعلان کیا تھا۔

یاد رہے کہ مقتدیٰ الصدر اس سے قبل بھی کئی مرتبہ سیاست اور حکومت سے علیحدگی کا اعلان کرچکے ہیں تاہم ابھی تک ان کا ملک کے ریاستی اداروں پر اثر ورسوخ قائم ہے اور ان کا ہزاروں مسلح افراد پر مشتمل گروپ بھی موجود ہے۔