بھارتی ریاست کرناٹک میں گٹر میں تیرتے ڈبوں سے 7 نومولود بچیوں کی لاشیں بر آمد ہوئیں۔
بھارتی میڈیا رپورٹ کے مطابق موڈلگی بس اسٹینڈ کے قریب شہریوں نے گٹر میں تیرتے مشکوک ڈبوں کی اطلاع پولیس کو دی۔
پولیس اہلکاروں نے وہاں پہنچ کر جب ڈبوں کو کھول کر دیکھا تو اُن میں 7 نومولود بچے مردہ حالت میں پائے گئے۔
بھارتی پولیس کے مطابق واقعہ کا مقدمہ متعلقہ تھانے میں درج کرتے ہوئے نومولود لاشوں کو مردہ خانے منتقل کردیا گیا۔
دوسری جانب حکام کا کہنا ہے کہ لیبارٹری ٹیسٹ کی مدد سے تحقیقات کا دائرہ مزید وسیع کیا جائےگا اور شناخت کے بعد والدین کے خلاف کارروائی کی جائے گی۔
Advertisement
علاوہ ازیں ڈسٹرکٹ ہیلتھ آفیسر نے واقعے کی تصدیق کرتے ہوئے کہا کہ یہ بظاہر اسقاط حمل ہے۔
انہوں نے خدشہ ظاہر کیا کہ والدین نے نومولود بچوں کی جنسی شناخت ظاہر ہونے کی صورت میں حمل ضائع کیا اور لاشیں ڈبوں میں کر کے گٹر میں پھینکی۔
تفتیشی ماہرین نے معاملے کی تحقیقات کو وسیع کرتے ہوئے ڈبوں اور اسپتال سے متعلق جانکاری حاصل کرنے کی کوشش بھی شروع کردی ہے۔
افسران کا ماننا ہے کہ کارروائی کسی ایک ہی اسپتال یا کلینک میں کی گئی ہے۔