سعودی عرب سمیت دنیا کے مختلف ممالک میں آج عید الاضحیٰ
سعودی عرب سمیت دنیا کے مختلف ممالک میں آج عید الاضحیٰ مذہبی عقیدت و احترام کے ساتھ منائی جارہی ہے۔
مسجد الحرام اور مسجد نبوی ﷺ میں نمازعید الاضحیٰ ادا کردی گئی ہے جبکہ اس موقع پر مسجد الحرام اور مسجدِ نبوی ﷺ میں بڑے روح پرور اجتماعات منعقد ہوئے۔
کروڑوں مسلمان سمیت حجاج کرام سنت ابراہیمی کی ادائیگی کرتے ہوئے جانوروں کی قربانی کریں گے جبکہ حجاج کرام قربانی کے بعد احرام کھول دیں گے۔
کورونا وباء کے دو سال بعد سعودی عرب کی تمام مساجد میں بھی عید الاضحیٰ کی نماز کے بڑے اجتماعات منعقد کیے گئے تھے۔
ترکیہ
ترکیہ میں بھی نمازِ عیدالاضحٰی ادا کر دی گئی ہے اور مقامی وقت کے مطابق صبح چھ بجے تمام ترکیہ میں نماز عید کی ادائیگی کی گئی۔
Advertisement
نماز عیدالاضحٰی کے بعد تمام افراد سنت ابراہیمی کی ادائیگی کے لئے متعلقہ قربان گاہوں کی طرف روانہ ہو چکے ہیں جبکہ قربان گاہوں پر شہریوں کا رش بڑھ گیا ہے جو اپنی اپنی اپاؤنمنٹ کے مطابق قربانی کی سنت ادا کریں گے۔
فلسطین
مسجد ااقصی میں بھی عید الاضحی منائی گئی اور بچوں نے فیس پینٹ کیے جبکہ لوگوں نے جوش و خروش کے ساتھ عید منائی۔
دیگر ممالک
دوسری جانب برطانیہ، امریکہ اور کینیڈا میں مسلمان کمیونٹی تقسیم دکھائی دی جس کے باعث بعض افراد آج اور بعض افراد کل عید الاضحیٰ منائیں گے۔
آسٹریلیا
آسٹریلیا میں ہر سال کی طرح اس سال بھی دو عیدوں کی روایت قائم رہی جبکہ کلینڈر کے مطابق عید منانے والے آج اور چاند دیکھ کر عید منانے والے کل منائیں گے۔
یورپ
یورپ سمیت فرانس میں آباد مسلمان آج عید الاضحیٰ انتہائی عقیدت اور جوش و جذبے کے ساتھ منا رہے ہیں، پیرس کے مضافات میں نماز عید کے مسلمانوں کے بڑے بڑے اجتماعات منعقد ہوئے۔
فرانس میں بسنے والے مسلمانوں نے مذبح خانوں کا رخ کیا اور عید کے جانور حاصل کرنے میں مصروف ہیں۔
دنیا بھر کی طرح پاکستان میں بھی بوہری برادری آج عید الاضحیٰ منارہی ہے اور کراچی کے علاقے صدر میں واقع بوہری مسجد میں عید الاضحیٰ کی نماز ادا کی گئی۔
اس موقع پر ملک کے استحکام کے لیے خصوصی دعائیں بھی کی گئی اور نماز عید کی ادائیگی کے بعد بوہری برادری نے سنت ابراہیمی ادا کی۔
نماز عید کے موقع پر بوہری مسجد جانے والے راستوں کو سیکیورٹی کے لیے بند کر دیا گیا تھا جبکہ سیکیورٹی کے لیے پولیس اور رینجرز تعینات تھی۔
واضح رہے کہ پاکستان سمیت بھارت اور کئی ممالک میں کل عید الاضحیٰ پورے مذہبی عقیدت و احترام کے ساتھ منائی جائے گی۔