پاکستان قونصلیٹ دبئی میں یوم استحصال کی تقریب کا انعقاد۔
کشمیری وپاکستانی کمیونٹی ممبران کی بڑی تعدادمیں شرکت
قونصلیٹ جنرل آف پاکستان، دبئی میں یوم استحصال کے حوالے سے تقریب کا انعقاد۔
تقریب میں دبئی میں مقیم کشمیری اور پاکستانی کمیونٹی کی بڑی تعدادمیں شرکت۔
قونصل جنرل جناب حسن افضل خان نے تقریب کی صدارت کی۔
تقریب کے دوران صدر، وزیر اعظم اور وزیر خارجہ پاکستان کے یوم استحصال کے حوالے سے خصوصی پیغامات پڑھ کر سنائے گئے۔
دبئی (اردوویکلی):: گزشتہ روز یوم استحصال کی مناسبت سے قونصلیٹ جنرل پاکستان دبئی میں قونصل جنرل حسن افضل کی زیرصدارت ایک بڑی تقریب کاانعقاد ہوا۔جس میں دبئی وشمالی امارات میں مقیم کشمیری وپاکستانی کمیونٹی کی بڑی تعدادنے شرکت کی ۔اجتماع سے کشمیری رہنماؤں اور مختلف شعبہ ہائے زندگی سے تعلق رکھنے والے کمیونٹی کے افراد نے خطاب کیا۔ انہوں نے 5 اگست 2019 کو بھارت کے یکطرفہ اور غیر قانونی اقدامات اور مقبوضہ جموں وکشمیر میں بھارتی فورسز کی طرف سے انسانی حقوق کی سنگین خلاف ورزیوں کی مذمت کی اور کشمیریوں کے عزم کا اعادہ کیا کہ وہ مقصد کے حصول تک بھارتی ریاستی دہشت گردی کے باوجود جدوجہد آزادی جاری رکھیں گے۔ انہوں نے اس بات پر زور دیا کہ بھارت اخلاقی اور قانونی طور پر کشمیری عوام کو ان کا حق خودارادیت دینے کا پابند ہے جیسا کہ اقوام متحدہ کے چارٹر میں درج ہے۔ انہوں نے عالمی برادری سے بھی اپیل کی کہ وہ تنازعہ کشمیری عوام کی خواہشات کے مطابق حل کرکے اپنا کردار ادا کرے۔یوم استحصال کی تقریب سے قنونصل جنرل حسن افضل خان کے علاوہ دیگرمقررین نے بھی خطاب کیاجس میں مظلوم کشمیریوں پربھارتی فورسزکے ناجائزتسلط اور ظلم کی مذمت کی گئی۔
تقریب سے خطاب کرتے ہوئے قونصل جنرل حسن افضل خان نے کہا کہ آج 5 اگست 2019 کو ہندوستان کے غیر قانونی اور یکطرفہ اقدامات کے تین سال مکمل ہورہے ہیں۔ اس غیر قانونی اور یکطرفہ اقدام کا مقصد جموں و کشمیر کی بین الاقوامی طور پر تسلیم شدہ متنازعہ حیثیت کو تبدیل کرنا اورمقبوضہ علاقہ کی آبادی کے ڈھانچے کو تبدیل کرنا ہے۔ یہ اقدام اقوام متحدہ کے چارٹر، سلامتی کونسل کی متعلقہ قراردادوں اور بین الاقوامی قانون کی صریح خلاف ورزی ہے۔ اقوام متحدہ کی متعدد رپورٹس جن میں 2018 اور 2019 میں انسانی حقوق کے ہائی کمشنر کے دفتر کی طرف سے کمیشن کی گئی دو رپورٹس نے کشمیری عوام کے خلاف جاری بھارتی مظالم کی دوبارہ تصدیق کی ہے۔قونصل جنرل ودیگرمقررین نے تنازعہ کشمیر کے پرامن حل کے لیے پاکستان کے موقف کا اعادہ کیا اور کشمیری بھائیوں کی اخلاقی، سیاسی اور سفارتی حمایت جاری رکھنے کے لیے پاکستان کی حکومت اور عوام کے مضبوط عزم کا اعادہ کیا۔ انہوں نے عالمی برادری، انسانی حقوق کی تنظیموں، بین الاقوامی میڈیا اور سول سوسائٹی سے مطالبہ کیا کہ وہ کشمیری عوام کی حالت زار کا نوٹس لیں جنہیں بھارتی مظالم کا نشانہ بنایا جا رہا ہے۔
تقریب میں مقبوضہ جموں وکشمیر میں بھارتی مظالم کی عکاسی کرنے والی تصویری نمائش کا اہتمام کیا گیا۔ تقریب کے دوران مقبوضہ جموں وکشمیر میں بھارتی قابض افواج کی طرف سے انسانی حقوق کی خلاف ورزیوں پر ایک مختصر دستاویزی فلم بھی دکھائی گئی۔ تقریب کا اختتام پرکشمیری شہداء کے لیے خصوصی دعاکی گئی۔
