بابر اعظم نے ویرات کوہلی کے ایک اور ریکارڈ پر نظریں جمالیں

By admin On ستمبر 27, 2022

پاکستان ٹیم کے آل فارمیٹ کپتان بابر اعظم کے پاس انگلینڈ کے خلاف پانچویں ٹی ٹوئنٹی میچ میں تاریخ کو دوبارہ دہرانے کا اہم موقعہ ہے۔

قومی ٹیم کے 27 سالہ نوجوان کپتان بابر اعظم نے ٹی ٹوئنٹی کرکٹ میں دو سنچریاں اسکور کررکھی ہیں جب کہ انہوں نے ایک اور بڑے کارنامے پر اپنی نظریں جمالیں ہیں۔

اسٹار بلے باز کے پاس ٹی ٹوئنٹی فارمیٹ میں ویرات کوہلی کو پیچھے چھوڑنے کا اہم موقع ہے۔

بھارت کے سابق کپتان ویرات کوہلی ٹی ٹوئنٹی فارمیٹ میں 3 ہزار رنز مکمل کرنے والے تیز ترین بلے باز ہیں جب کہ کوہلی نے ٹیم انڈیا کے لیے یہ کارنامہ 81 اننگز میں انجام دیا ہے۔

ویرات کوہلی نے 2021 میں انگلینڈ کے دورہ بھارت کے دوران تیز ترین 3 ہزار مکمل کیے تھے۔

بابر اعظم کے پاس کل لاہور میں ہونے والے پانچویں ٹی ٹوئنٹی میچ میں ویرات کوہلی کا ریکارڈ توڑنے کا اہم موقع ہے۔

بابر اعظم نے ٹی ٹوئنٹی انٹرنیشنل کی 79 اننگز میں 2939 رنز اسکور کرلیے ہیں جب کہ انہیں ویرات کوہلی کا ریکارڈ توڑنے کے لیے اگلے میچ میں صرف 61 رنز بنانے ہوں گے۔

واضح رہے کہ اس سے قبل بابر اعظم پاکستان اور انگلینڈ کے درمیان جاری سیریز کے دوران ٹی ٹوئنٹی میں تیز ترین 8 ہزار رنز مکمل کرنے والے دوسرے بلے باز بن گئے ہیں۔