سفیرپاکستان کا شیخ طحنون بن محمد میڈیکل سٹی اور سلمیٰ بحالی مرکزالعین کا دورہ۔

العین(نیوزڈیسک):سفیرپاکستان برائے متحدہ عرب امارات فیصل نیاز ترمذی نے گزشتہ دنوں شیخ طحنون بن محمد میڈیکل سٹی  اور سلمیٰ بحالی مرکزالعین کا دورہ کیا۔ چیف ایگزیکٹو آفیسرسلطان محمد الکرام اور چیف آپریٹنگ آفیسرعیسیٰ جابر الکویتی نے اپنی ٹیم کے ہمراہ سفیر پاکستان  فیصل نیازترمذی کا استقبال کیا۔ سفیرپاکستان نے ہسپتال میں پاکستانی مریضوں کی عیادت کی، ان کی صحت کے بارے میں دریافت کیا اور ان کی جلد صحت یابی کی خواہش کااظہارکیا۔ انہوں نے وہاں کے ڈاکٹرز، سرجنز اور پیرا میڈیکل سٹاف کی  پیشہ وارانہ مہارت اور ہمدردانہ نگہداشت پر تعریف کی اور مریضوں اور ہسپتال کی قیادت دونوں کو سفارتخانہ پاکستان کے مکمل تعاون کی یقین دہانی کرائی-سفیرفیصل نیاز ترمذی نے ہسپتال کے منفرد ویلنیس اویسس کا بھی دورہ کیا اور جدید ترین سہولیات کی تعریف کی۔  انہوں نے صحت کی دیکھ بھال میں بہترین کارکردگی اور پاکستانی مریضوں کو مثالی دیکھ بھال فراہم کرنے کے لیے انتظامیہ کا شکریہ ادا کیا۔