ایشیاکپ سپر فور مرحلہ؛ پاکستان نے بھارت کا غرور خاک میں ملادیا

By admin On ستمبر 5, 2022

دبئی: ٹی ٹوئنٹی ایشیاکپ سپر فور مرحلے کے میچ میں پاکستان نے سنسنی خیز مقابلے کے بعد بھارت کو شکست دے دی ہے۔

متحدہ عرب امارات میں ٹی ٹوئنٹی ایشیاکپ 2022 کے میچز جاری ہیں جس کا سپر فور مرحلہ گذشتہ روز شروع ہوا۔

سپر فور مرحلے میں آج بڑا مقابلہ روایتی حریف پاکستان اور بھارت کی ٹیموں کے درمیان دبئی انٹرنیشنل کرکٹ اسٹیڈیم میں کھیلا گیا۔

بھارت کی بیٹنگ

اس میچ میں پاکستان نے ٹاس جیت کر پہلے بولنگ کرنے کا فیصلہ کیا جب کہ بھارت نے بیٹنگ کرتے ہوئے 5 اوورز کے اختتام تک بغیر کوئی وکٹ گنوائے 54 رنز اسکور کیے۔

بعد ازاں چھٹا اوور پاکستان کے لیے خوش قسمت ثابت ہوا جب شاداب خان کی پہلی گیند پر کپتان روہت شرما 28 رنز بناکر آؤٹ ہوگئے۔

بھارت کی دوسری وکٹ 62 رنز پر گری جب کے ایل راہول کو محمد نواز نے 28 رنز پر آؤٹ کردیا، سوریا کمار یادیو 13، رشبھ پنت 14، ہاردک پانڈیا صفر اور دیپک ہودا 16 رنز بناکر پویلین لوٹ گئے۔

بھارت کی جانب سے ویرات کوہلی سب سے زیادہ 60 رنز بناکر آخری اوور میں رن آؤٹ ہوئے جب کہ بھارت نے مقررہ 20 اوورز میں 7 وکٹوں کے نقصان پر 181 رنز اسکور کیے۔

پاکستان کی جانب سے شاداب خان نے 2 وکٹیں حاصل کیں جب کہ محمد نواز، حارث رؤف، محمد حسنین اور نسیم نے ایک ایک کھلاڑی کو آؤٹ کیا۔

پاکستان کی بیٹنگ

ہدف کے تعاقب میں پاکستان کی سست روی سے بیٹنگ جاری رہی جب کہ پاکستان نے 10 اوورز کے اختتام تک 2 وکٹوں کے نقصان پر صرف 76 رنز ہی اسکور کیے تھے۔

بعد ازاں قومی بلے بازوں نے جارحانہ بلے بازی کا مظاہرہ کیا اور مقررہ ہدف ایک گیند پہلے پورا کرکے بھارت کا غرور خاک میں ملادیا۔

پاکستان کی جانب سے محمد رضوان نے سب سے زیادہ 71 رنز اسکور کیے جب کہ محمد نواز جارحانہ 42 رنز بناکر آؤٹ ہوئے۔

علاوہ ازیں آصف علی 16، فخرزمان 15، کپتان بابر اعظم 14 رنز بنانے میں کامیاب رہے جب کہ خوشدل شاہ 14 رنز بناکر ناٹ آؤٹ رہے۔

بھارت کی جانب سے بھونیشور کمار، ارشدیپ سنگھ، روی بشنوئی، ہاردک پانڈیا اور یوزویندر چہل نے ایک ایک وکٹ حاصل کی۔

پاکستانی پلیئنگ الیون

پاکستانی اسکواڈ میں کپتانی کے فرائض بابر اعظم اور نائب کپتانی کے فرائض شاداب خان انجام دیے جب کہ دیگر اسکواڈ میں وکٹ کیپر و بیٹر محمد رضوان، فخر زمان، افتخار احمد، خوشدل شاہ، آصف علی، محمد نواز، حارث رؤف، نسیم شاہ اور شاہ نواز دھانی کی جگہ محمد حسنین کو شامل کیا گیا تھا۔

بھارتی پلیئنگ الیون

بھارتی ٹیم کی قیادت روہت شرما نے کی جب کہ دیگر اسکواڈ میں ویرات کوہلی، کے ایل راہول، سوریا کمار یادیو، رشبھ پنت، دیمپ ہودا، ہاردک پانڈیا، بھونیشور کمار، روی بشنوئی، ارشدیپ سنگھ اور یوزویندر چہل شامل تھے۔