انگلینڈ اور بھارت کے مابین برمنگھم میں جاری ٹیسٹ میچ کے پہلے دن کھیل کے اختتام پر بھارت نے 7 وکٹوں کے نقصان پر 338 رنز بنا لئے۔
انگلینڈ نے ٹاس جیت کر بھارت کو پہلے بیٹنگ کی دعوت دی، جیمز اینڈرسن کی تباہ کن بولنگ نے بھارتی بیٹنگ لائن کے پرخچے اڑا دیئے۔
بھارت کی 5 وکٹیں صرف 98 رنز پر گر گئیں، کئی ماہ سے جدوجہد کرنے والے کوہلی اس مرتبہ بھی ناکام ہو گئے اور صرف 11 رنز بنا کر پویلین لوٹ گئے۔
اس موقع پر ریشبھ پنت اور رویندر جڈیجہ نے ٹیم کو سنبھالا اور 222 رنز کی بہترین شراکت داری بنائی۔
ریشبھ پنت نے 146 رنز کی خوبصورت اننگ کھیلی جس میں 19 چوکے اور 4 چھکے شامل تھے۔
رویندر جڈیجہ 83 رنز کے ساتھ ناٹ آؤٹ ہیں ، ان کے ساتھ دینے کے لیے محمد شامی کریز پر موجود ہیں۔
Advertisement
انگلینڈ کی جانب سے جیمز اینڈریسن نے 3 وکٹیں حاصل کیں جبکہ دو وکٹیں میتھیو پاٹ کے نام رہی۔
واضح رہے کہ اس میچ میں جسپریت بمرا بھارتی ٹیم کی قیادت کے فرائض انجام دے رہے ہیں، انہیں روہت شرما کا کورونا ٹیسٹ مثبت آنے کے بعد یہ عہدہ عارضی طور پر دیا گیا ہے۔