ٹی ٹوئنٹی ورلڈ کپ میں کل ہونے والے پاکستان اور بھارت کے میچ کو بھارتی ٹیم کے کپتان روہت شرما نے چیلنج قرار دے دیا۔
تفصیلات کے مطابق کپتان روہت شرما نے آج میڈیا سے باتیں کرتے ہوئے کہا کہ ان کی ٹیم ٹی ٹوئنٹی ورلڈ کپ کے اپنے افتتاحی میچ میں روایتی حریف پاکستان کا سامنا کرنے کے ایک “چیلنج” کے طور پر دیکھ رہی ہے۔
دونوں پڑوسی اور روایتی حریف پاکستان اور بھارت کل تماشائیوں سے بھرے میلبورن کرکٹ گراؤنڈ میں اپنے پہلے میچ میں آمنے سامنے ہوں گے.
میڈیا سے باتیں کرتے ہوئے بھارتی ٹیم کے قائد روہت شرما نے کہا کہ میں اس میچ کے لیے دباؤ کا لفظ استعمال نہیں کرنا چاہتا کیونکہ دباؤ مستقل ہوتا ہے البتہ میں اسے ایک چیلنج کے طور پر لینا چاہوں گا.
Advertisement
روہت شرما نے اس بات کا بھی اعتراف کیا کہ موجودہ پاکستانی ٹیم بہت چیلنجنگ ٹیم ہے۔
واضح رہے کہ بھارت عام طور پر 1990 کی دہائی کے اواخر سے کرکٹ کے میدان پر پاکستان پر حاوی رہا ہے لیکن وہ اپنے گزشتہ تین میں سے دو میچ ہار چکا ہے جس میں گزشتہ سال متحدہ عرب امارات میں ٹی ٹوئنٹی ورلڈ کپ کا گروپ میچ بھی شامل ہے۔
یاد رہے کہ کرکٹ کے مختصر فارمیٹ ٹی ٹوئنٹی کی نمبر ایک بھارتی ٹیم 2013 کی چیمپئنز ٹرافی کے بعد سے عالمی ٹائٹل بھی نہیں جیت سکا اور فیورٹ ہونے کے باوجود حالیہ ایشیا کپ کے فائنل سے محروم رہا۔
روہت شرما نے کہا کہ گزشتہ سال ورلڈ کپ میں پاکستان کی ٹیم نے اچھی کارکردگی کا مظاہرہ کیا تھا، یہ ہمارے لیے خوش قسمتی کی بات ہے کہ رواں برس ہمیں ایشیا کپ میں دو مرتبہ پاکستانی ٹیم سے کھیلنے کا موقع ملا۔
Advertisement
شرما کے مطابق کل کے بلاک بسٹر میچ سے قبل ہمیں پاکستانی ٹیم کی طاقت اور کمزوریوں کا اندازہ لگانا ہے۔
روہت شرما نے اعتراف کیا کہ یہ ہمارے کھلاڑیوں کے دماغ میں ہے کہ گزشتہ نو سالوں سے ہماری ٹیم نے کوئی بین الاقوامی ایونٹ نہیں جیتا لیکن اس کو دور رکھنا اور صرف اپنے کھیل پر توجہ دینا ضروری ہے.
میڈیا سے گفتگو میں روہت شرما کا کہنا تھا کہ یہ میرا ذاتی عقیدہ ہے کہ اگر آپ ماضی کے بارے میں بہت زیادہ سوچتے ہیں تو پھر آپ حال پر توجہ نہیں دے پائیں گے۔
واضح رہے کہ جوہری ہتھیاروں سے لیس دونوں پڑوسی ممالک کے سیاسی تعلقات کشیدہ ہیں اور انہوں نے 2007 کے بعد سے کوئی ٹیسٹ میچ نہیں کھیلا ہے.
Advertisement