بھارت کی ریاست تامل ناڈو کے ایک مندر میں ہندو مذہبی جلوس کے دوران کرنٹ لگنے سے 11 افراد ہلاک اور 15 زخمی ہو گئے ہیں۔
بھارتی نیوز چینل این ڈی ٹی وی کے مطابق افسوس ناک واقعہ بدھ کو علی الصبح تامل ناڈو کے ضلع تھان جاور کے گاؤں کالی میدو میں پیش آیا ہے۔
پولیس کا کہنا ہے کہ واقعہ اس وقت پیش آیا جب مذہبی جلوس میں چلنے والی مندر کی رتھ بجلی کی ایک ہائی ٹرانسمیشن لائن سے ٹکرا گئی جس کے نتیجے میں وہ جل کر مکمل طور پر خاکستر ہو گئی۔
عینی شاہدین کے مطابق مندر کی رتھ کو جلوس کے راستے میں ایک جگہ سے موڑنے میں رکاوٹ پیش آئی تو موڑنے کی کوشش میں وہ اُلٹ گئی۔ اِسی دوران رتھ اوپر سے گزرنے والے بجلی کے ہائی وولٹیج تاروں سے چُھو گئی جس سے اُس پر بیٹھے افراد کرنٹ لگنے سے شدید زخمی ہو کر نیچے گر گئے۔
واقعے میں ہلاک ہونے والوں میں دو بچے بھی شامل ہیں جبکہ دیگر زخمیوں کو قریبی ہسپتال منتقل کرکے طبی امداد دی جا رہی ہے۔
تیروچرپالی کے آئی جی پولیس وی بالکرشنان کا کہنا ہے کہ واقعے کا مقدمہ درج کر لیا گیا ہے اور اس کی تحقیقات جاری ہیں۔
تامل ناڈو کے وزیراعلٰی ایم کے اسٹالن نے سوگوار خاندانوں سے گہرے دُکھ کا اظہار کرتے ہوئے مرنے والوں کے ورثاء کو 5 لاکھ روپے دینے کا اعلان کیا ہے۔