ریلی روسو نے بھارتی بولنگ کے پرخچے اڑا دیے

By admin On اکتوبر 4, 2022

ریلی روسو کی شاندار سنچری کی بدولت جنوبی افریقہ نے تیسرے ٹی ٹوئنٹی میچ میں بھارت کو شکست دے دی ہے۔

بھارت اور جنوبی افریقہ کی ٹیموں کے درمیان اندور کے ہولکر کرکٹ اسٹیڈیم میں ٹی ٹوئنٹی سیریز کا تیسرا اور آخری میچ کھیلا گیا جس میں جنوبی افریقہ نے بھارت کو شکست سے دوچار کیا۔

اس میچ میں بھارتی کپتان روہت شرما نے ٹاس جیت بولنگ کرنے کا فیصلہ کیا جو ان کے لیے بدقسمت ثابت ہوا۔

جنوبی افریقہ کے کھلاڑی ریلی روسو نے بھارت کی جیت کا خواب چکنا چور کردیا جب کہ ان کی ناقابل شکست سنچری کی بدولت جنوبی افریقہ نے بھارت کو جیت کے لیے 228 رنز کا بڑا ہدف دیا۔

ریلی روسو نے اس میچ میں 48 گیندوں پر سنچری بناکر بھارتی بولرز کے پرخچے اڑائے تو کوئنٹن ڈی کوک نے بھی ان کا بھرپور ساتھ دیا اور 68 رنز کی شاندار اننگز کھیلی۔

دونوں کھلاڑیوں نے دوسری وکٹ پر 48 گیندوں پر 90 رنز کی بڑی شراکت قائم کی جب کہ بھارت کی جانب سے دیپک چہار اور امیش یادیو نے ایک ایک کھلاڑی کو آؤٹ کیا۔

ہدف کے تعاقب میں بھارتی ٹیم 18.3 اوورز میں 178 رنز پر ہی ڈھیر ہوگئی اور دنیش کارتک کے علاوہ کوئی بھی کھلاڑی بڑی اننگز کھیلنے میں ناکام رہا۔

دنیش کارتک نے 46 رنز کی اننگز کھیلی جب کہ رشبھ پنت 27 اور دیپک چہار نے 31 رنز بنائے۔

جنوبی افریقہ کی جانب سے ڈیوائن پریٹوریس نے 3 کھلاڑیوں کو آؤٹ کیا، کیشو مہاراج، لنگی نگاڈی اور وین پارنیل نے دو دو وکٹیں حاصل کیں۔