شاہین کی بحالی کے حوالے سے آفریدی کے بیان پر وسیم اکرم حیران

By admin On ستمبر 16, 2022

شاہین کی بحالی کے حوالے سے شاہد آفریدی کے بیان نے سب کو حیران کردیا ہے جس میں ان کا کہنا ہے کہ فاسٹ بولر شاہین شاہ آفریدی انگلینڈ میں اپنی بحالی کا خرچ خود اٹھارہے ہیں۔

شاہد آفریدی کے تازہ بیان پر سابق کپتان وسیم اکرم نے ردعمل کا اظہار کیا ہے جس میں ان کا کہنا ہے کہ ’اگر ایسا ہے تو یہ واقعی چونکا دینے والی بات ہے کیونکہ شاہین شاہ آفریدی ایک ٹاپ پلیئر ہیں‘۔

انہوں نے کہا کہ اگر پاکستان کرکٹ بورڈ اپنے اہم ستاروں کی دیکھ بھال نہیں کر پارہا تو یہ واقعی نا انصافی ہوگی۔

وسیم اکرم نے مقامی نیوز چینل کو انٹرویو میں کہا کہ شاہین شاہ آفریدی کو تو فوراً کسی بہترین سرجن کے پاس بھیج دینا چاہیے تھا لیکن وہ خود یہ سب کررہے ہیں جس پر میں حیران ہوں۔

واضح رہے کہ اس سے قبل شاہد آفریدی کا کہنا تھا کہ ’شاہین شاہ اپنے ہی ٹکٹ پر برطانیہ گئے ہیں اور وہ اپنے پیسوں پر وہاں رہ رہے ہیں جب کہ میں نے وہاں ان کے لیے ڈاکٹر کا بندوبست کیا ہے‘۔

شاہد آفریدی کا کہنا تھا کہ پی سی بی اس سب میں کچھ نہیں کررہا، جہاں تک میں جانتا ہوں وہ وہاں رہنے اور ڈاکٹروں کے ساتھ ہم آہنگی کے لیے خود سے ہی سب کچھ کررہے ہیں۔

دوسری جانب گذشتہ رات پی سی بی نے وضاحت جاری کرتے ہوئے کہا تھا کہ ’بورڈ ہمیشہ اپنے تمام کھلاڑیوں کی طبی دیکھ بھال کا انتظام کرنے کا ذمہ دار ہے‘۔

پی سی بی کا اپنے بیان میں کہنا تھا کہ ’ہمیں یہ بتاتے ہوئے بہت خوشی ہورہی ہے کہ شاہین شاہ لندن میں اپنی بحالی پر شاندار پیش رفت کررہے ہیں اور ان کا ٹی ٹوئنٹی ورلڈ کپ سے قبل مکمل طور پر صحتیاب ہونے کا امکان ہے‘۔