ثقلین مشتاق خوشدل شاہ کی حمایت میں سامنے آگئے

By admin On اکتوبر 6, 2022

قومی ٹیم کے ہیڈکوچ ثقلین مشتاق خراب پرفارمنس کے بعد بھی مڈل آرڈر بلے باز خوشدل شاہ کی حمایت میں سامنے آگئے ہیں۔

مڈل آرڈر بلے باز خوشدل شاہ ایشیاکپ کے بعد سے اپنی پرفارمنس کے باعث شدید دباؤ کا شکار ہیں، ایسے وقت میں قومی ٹیم کے ہیڈ کوچ ثقلین مشتاق ان کی حمایت میں سامنے آگئے ہیں۔

ہیڈکوچ ثقلین مشتاق کا کہنا ہے کہ ’اس بات کو بڑھا چڑھا کر پیش کیا جارہا ہے جب کہ خوشدل شاہ کو صرف اچھی قسمت کی ضرورت ہے‘۔

نیوزی لینڈ میں جاری تربیتی سیشن کے دوران نجی خبر رساں ادارے سے گفتگو کرتے ہوئے ثقلین مشتاق نے کہا کہ ’مجھے نہیں لگتا یہ کوئی بڑا مسئلہ ہے، لوگ اس کو بڑھا چڑھاکر پیش کررہے ہیں‘۔

انہوں نے کہا کہ خوشدل شاہ بہت پر اعتماد ہیں اور اپنی کرکٹ سے لطف اندوز ہورہے ہیں، بس انہیں تھوڑی قسمت کی ضرورت ہے۔ کبھی کبھی کرکٹر کو ایسی صورت حال کا سامنا کرنا پڑتا ہے اور اگر آپ کو بلے بازی کرتے ہوئے ایک دو باؤنڈریز مل جائیں تو کھلاڑی کا اعتماد آسمان کو چھونے لگتا ہے۔

واضح رہے کہ پچھلے دنوں انگلینڈ کے خلاف آخری ٹی ٹوئنٹی میچ میں جب خوشدل شاہ آؤٹ ہونے کے بعد واپس پویلین لوٹ رہے تھے تو شائقین کرکٹ نے ان کے خلاف ’پرچی پرچی‘ کے نعرے لگائے تھے۔

خوشدل شاہ پر ہونے والی تنقید کے حوالے سے ثقلین مشتاق نے کہا کہ ہر کھلاڑی کو اپنے کھیل کے دنوں میں اتار چڑھاؤ کا سامنا کرنا پڑتا ہے اور پلیئنگ الیون کا ہر ایک کھلاڑی پرفارم نہیں کرتا ہے۔

ان کا کہنا تھا کہ ہمارے لوگ بہت جذباتی ہیں، میرے خیال میں ہمیں اپنے دماغ سے فیصلے کرنے چاہیے نہ کہ اپنے جذبات کی بنیاد پر ہم فیصلہ کریں۔

سابق آف اسپنر نے کہا کہ ’میں سمجھتا ہوں کہ لوگ پاکستان سے، خود سے اور یہاں تک کہ کھلاڑیوں سے بھی محبت کرتے ہیں لیکن ہمیں کسی فرد کے ساتھ ذاتی نہیں ہونا چاہیے‘۔

انہوں نے مزید کہا کہ ٹیم کا ہر کھلاڑی پرفارم نہیں کرتا چاہے آپ 1992 کا ورلڈکپ دیکھ لیں جس میں کئی کھلاڑیوں نے پرفارم کیا لیکن کئی اچھے کھلاڑی پرفارم نہیں کرسکے تھے۔

خیال رہے کہ پاکستان ٹیم سہ فریقی سیریز کے لیے نیوزی لینڈ میں موجود ہے، جہاں کل پاکستان کا مقابلہ بنگلادیش سے ہوگا۔

اس سیریز کے حوالے سے بات کرتے ہوئے انہوں نے کہا کہ آسٹریلیا میں ہونے والے ورلڈ کپ سے قبل ہم قومی ٹیم میں مختلف چیزیں آزمائیں گے۔ ظاہر ہے یہ سیریز ورلڈ کپ سے قبل ہمارے لیے بہت اہمیت کی حامل ہے اور اس کے لیے ہم خود کو تیار کررہے ہیں۔