ٹی ٹوئنٹی ورلڈکپ؛ پاک بھارت میچ میں کتنے شائقین نے شرکت کی؟

By admin On اکتوبر 23, 2022

میلبورن: پاکستان اور بھارت کے درمیان ہونے والے ہائی وولٹیج میچ میں شائقین کی ایک بڑی تعداد موجود تھی۔

میلبورن کے تاریخی اسٹیڈیم میں روایتی حریف بھارت اور پاکستان کے درمیان ٹی ٹوئنٹی ورلڈ کپ کے سپر 12 مرحلے کا میچ کھیلا گیا جس میں بھارت نے سنسنی خیز مقابلے کے بعد کامیابی اپنے نام کی۔

اس میچ میں شائقین کی ایک بڑی اسٹیڈیم میں نظر آئی جب کہ میچ کے ٹکٹس بھی کئی روز پہلے فروخت ہوچکے تھے۔

رپورٹس کے مطابق پاک بھارت میچ دیکھنے کے لیے میلبورن کے تاریخی اسٹیڈیم میں 90 ہزار سے زائد شائقین گراؤنڈ میں موجود تھے جن میں سے زیادہ تر بھارتی شائقین تھے جو اپنی ٹیم کو بھی سپورٹ کرتے دکھائی دیے۔

واضح رہے کہ اس میچ میں بھارت نے ٹاس جیت کر پہلے بولنگ کرنے کا فیصلہ کیا اور پاکستان نے بیٹنگ کرتے ہوئے مقررہ اوورز میں 8 وکٹوں کے نقصان پر 159 رنز اسکور کیے۔

اننگز کے شروعات میں پاکستانی اوپنرز ناکام ہوگئے لیکن بعد ازاں مڈؒل آرڈر بلے باز نے ٹیم کو سہارا دیا، شان مسعود اور افتخار احمد کی جارحانہ بیٹنگ کی بدولت پاکستان ایک درمیانہ ہدف دینے میں کامیاب رہا۔

ہدف کے تعاقب میں بھارتی بیٹنگ بھی شروعات میں لڑکھڑا گئی اور ان کی 4 وکٹیں صرف 31 رنز پر ہی ڈھیر ہوگئیں تاہم ویرات کوہلی اور ہاردک پانڈیا کی زبردست بلے بازی کی وجہ سے بھارت نے مجموعی ہدف 6 وکٹوں کے نقصان پر آخری گیند پر پورا کرلیا۔

میچ کے بہترین کھلاڑی کا اعزاز ویرات کوہلی کے نام رہا جو 53 گیندوں پر 82 رنز بناکر ناٹ آؤٹ رہے جب کہ ہاردک پانڈیا 40 رنز بناکر آؤٹ ہوئے۔