باکسر عامر خان کی قیمتی گھڑی چھیننے والے ملزمان عدالت میں پیش
پاکستانی نژاز برطانوی باکسر عامر خان کی قیمتی گھڑی چھیننے والے 3 ملزمان کو عدالت میں پیش کردیا گیا ہے۔
سابق عالمی باکسنگ چیمپئن اور پاکستانی نژاد باکسرعامر خان کو مشرقی لندن کی ایک سڑک پر بندوق کی نوک پر 72 ہزار پاؤنڈ کی گھڑی سے محروم کردیا گیا تھا۔
اس کیس میں پولیس نے تین افراد کو عدالت میں پیش کیا ہے جس میں 25 سالہ احمد بانا، 24 سالہ نورالامین اور شمالی لندن کے 20 سالہ ڈینٹ کیمبل شامل ہیں، ان ملزمان پر ٹیمز مجسٹریٹ کی عدالت میں ڈکیتی کی سازش کا الزام ہے۔
ملزمان کو ریمانڈ پر جیل بھیج دیا گیا ہے جبکہ مزید سماعت 25 جولائی کو اسنیئر بروکس کراؤن کورٹ میں ہوگی۔
Advertisement
سماعت کے دوران عدالت کو بتایا گیا کہ جب عامر خان ہائی روڈ پر واقع مقام سے نکلے تو ایک کار سڑک پر آگئی جس میں بیٹھے تین افراد نے عامر خان کے سر پر گن رکھ کر انہیں گھڑی سے محروم کردیا تھا۔
واضح رہے کہ 35 سالہ عامرخان سے اپریل کے مہینے میں ریسٹورنٹ سے نکلنے کے بعد گن پوائنٹ پرفرینک مولر گھڑی چھین لی گئی تھی جس کی مالیت 72 ہزار پاؤنڈ بتائی جارہی ہے جبکہ اس موقع پر ان کے ہمراہ اہلیہ فریال مخدوم اور ایک دوست بھی موجود تھے۔