یوکرینی صدر زیلینسکی کا کہنا ہے کہ ملک کی تعمیرنو اور بحالی کیلیے 750 ارب ڈالرکی ضرورت ہوگی۔
غیر ملکی خبر رساں ادارے کے مطابق یوکرین کے صدر زیلینسکی نے سوئٹزرلینڈ میں چالیس سے زائد ممالک اور عالمی اداروں کے دو روزہ یوکرین ریکوری کانفرنس سے ورچوئل خطاب کیا۔ مشاورتی اجلاس کا انعقاد روس کے حملوں سے تباہ حال یوکرین کی تعمیر اور ترقی کے لیے کیا گیا تھا۔
اس موقع پر یوکرینی صدر زیلینسکی نے اپنے خطاب میں کہا کہ روس نے جنگ مسلط کرکے یوکرین کو تباہ کردیا ہے۔ اب یوکرین کی تعمیرِ نو اور بحالی پوری جمہوری دنیا کا مشترکہ فریضہ ہونا چاہیے۔
ساڑھے سات سو ارب ڈالر مالیت کا منصوبہ پیش کرتے ہوئے یوکرینی صدر کا کہنا تھا کہ دوسری عالمی جنگ کے بعد یورپ کی تعمیرِ نو کے لیے ایسا ہی منصوبہ بنایا گیا تھا۔
اجلاس میں جنگ کے خاتمے کے فوری بعد یوکرین کی تعمیرِ نو کے آغاز سے متعلق تجاویز پیش کی گئی اور ایک مشترکہ لائحہ عمل تیار کرنے پر زور دیا گیا جس سے جنگ زدہ ملک کے زخموں کو بھرا جا سکے۔
Advertisement
یاد رہے، 24 فروری کو روسی افواج نے یوکرین پر حملہ کردیا تھا جس کے بعد عالمی سطح پر روس اور مغربی ممالک کے تعلقات ختم ہونے کی نہج پر پہنچ چکے ہیں۔