بنگلہ دیش میں ہندو یاتریوں کی کشتی الٹنے سے 24 افراد ہلاک، متعدد لاپتہ

By admin On ستمبر 25, 2022

بنگلہ دیش میں گنجائش سے زیادہ ہندو یاتریوں کو لے جانے والی کشتی الٹ گئی ہے۔

غیر ملکی خبر رساں ادارے کے مطابق بنگلہ دیشی پولیس حکام کا کہنا ہے کہ ہندو یاتریوں کو لے جانے والی کشتی میں ضرورت سے زیادہ مسافر سوار تھے جس کے باعث وہ حادثے کا شکار ہوئی۔

پولیس حکام کے مطابق کشتی میں سوار 24 افراد ہلاک ہوگئے ہیں جب کہ اتنے ہی افراد لاپتہ بھی ہیں، ریسکیو ورکرز اور غوطہ خوروں کی جانب سے مزید لاشوں کی تلاش کے لیے آپریشن جاری ہے۔

حکام کا کہنا ہے کہ مرنے والوں میں اکثریت کی تعداد عورتوں اور بچوں کی ہے جب کہ اندازے کے مطابق کشتی میں 50 مسافر سوار تھے۔

رپورٹ کے مطابق ہندو یاتری شمالی بنگلہ دیش کے بوڈا نامی قصبے کے قریب کاروتوا دریا کے درمیان واقع مندر کی طرف جارہے تھے جو کہ صدیوں پرانا مندر ہے۔

یاتریوں کی کشتی اچانک حادثے کو شکار ہوئی جب کہ مقامی رپورٹس کے مطابق 10 افراد کی جان بچالی گئی ہے جن کو قریبی اسپتال منتقل کیا گیا ہے۔

مقامی نیوز چینل پر نشر ہونے والی ویڈیو میں دیکھا گیا ہے کہ یوتریوں سے بھری ہوئی کشتی اچانک ڈوب گئی جس کے بعد دریا کنارے کھڑے افراد نے چلانا شروع کردیا۔

جس وقت کشتی حادثے کا شکار ہوئی تو موسم صاف اور دریا بھی خاموش تھا۔

واضح رہے کہ بنگلہ دیش مسلمان اکثریتی ملک ہے جہاں ہر سال ہزاروں ہندو یاتری بودیشواری مندر میں پوجا کرنے جاتے ہیں۔