بھارت کا پاکستان آنے سے انکار، ویو رچرڈ کی پاکستان کی حمایت

By admin On اکتوبر 19, 2022

بھارت کے ایشیاکپ 2023 کے لیے پاکستان آنے سے انکار کے بعد ویو رچرڈز پاکستان کی حمایت میں سامنے آگئے ہیں۔

بی سی سی آئی نے اگلے سال ہونے والے ایشیا کپ کے لیے اپنی ٹیم کو پاکستان بھیجنے سے انکار کردیا ہے جس پر ویسٹ انڈیز کے لیجنڈ بلے باز سر ویو رچرڈز نے پاکستان کی حمایت کردی ہے۔

سر ویو رچرڈز گوادر شارک کے مینٹور کے طور پر پاکستان جونیئر لیگ کا حصہ ہیں۔ ان کا کہنا ہے کہ پاکستان کرکٹ کھیلنے کے لیے محفوظ جگہ ہے۔

انہوں نے کہا کہ ’میں جب پاکستان میں ہوتا ہوں تو گھر جیسا محسوس کرتا ہوں، مجھے پاکستان میں کسی قسم کے مسائل کا سامنا نہیں اور میں یہاں انتہائی محفوظ محسوس کرتا ہوں‘۔

سر ویو رچرڈز کا پڑوسی ممالک کے درمیان ہونے والے میچز کی اہمیت پر زور دیتے ہوئے کہنا تھا کہ پاکستان اور بھارت کے درمیان میچ دیکھنا ہمیشہ ہی اچھا لگتا ہے۔

انہوں نے خواہش ظاہر کی کہ میں ان ٹیموں کو زیادہ کثرت سے ٹکراتے ہوئے دیکھنا چاہتا ہوں اور امید ہے مستقبل میں چیزیں بدل جائیں گی۔

واضح رہے کہ منگل کو ممبئی میں بی سی سی آئی کی سالانہ جنرل میٹنگ منعقد ہوئی تھی جس میں ایشیاکپ 2023 کے لیے بھارتی ٹیم کو پاکستان نہ بھیجنے کا فیصلہ کیا گیا تھا۔

علاوہ ازیں بھارتی کرکٹ بورڈ نے ٹورنامنٹ کو غیر جانبدار مقام پر منتقل کرنے کا بھی مطالبہ کیا ہے جب کہ پاکستان نے ون ڈے فارمیٹ کے ایشیا کپ کی میزبانی اگلے برس ستمبر میں کرنی ہے۔

خیال رہے کہ دونوں ممالک کے درمیان کشیدہ تعلقات کی وجہ سے بھارت نے 2008 سے پاکستان کا سفر نہیں کیا ہے۔

آخری مرتبہ 2012 میں دو طرفہ سیریز کھیلی گئی تھی جب کہ پاکستان نے محدود اوورز کے میچز کے لیے بھارت کا دورہ کیا تھا۔