محمد حارث نے اپنی کامیابی کا کریڈٹ بابر اعظم کو دے دیا

By admin On نومبر 6, 2022

نوجوان وکٹ و بیٹر محمد حارث کہتے ہیں کہ جنوبی افریقہ کے خلاف میچ میں کپتان بابر اعظم نے مجھے بغیر کسی خوف کے بیٹنگ کرنے کا مشورہ دیا تھا۔

پاکستان کے ابھرتے ہوئے وکٹ کیپر و بیٹر محمد حارث کو جنوبی افریقہ کے خلاف میچ میں فخر زمان کی جگہ ٹیم میں شامل کیا گیا تھا۔

انہوں نے اپنی پرفارمنس سے سلیکشن کو درست ثابت کیا اور سڈنی کرکٹ گراؤنڈ میں جنوبی افریقہ کے تیز گیند بازوں کے خلاف جارحانہ بلے بازی کا مظاہرہ کرکے دنیا کو حیران کردیا۔

انہوں نے اس میچ میں تین چھکوں اور دو چوکوں کی مدد سے 11 گیندوں پر 28 رنز اسکور کیے اور پاکستان کو شاندار آغاز فراہم کیا۔

پاکستان کرکٹ بورڈ کی جانب سے ایک ویڈیو شیئر کی گئی ہے جس میں محمد حارث نے اپنی کارکردگی سے متعلق بتاتے ہوئے کپتان بابر اعظم کی تعریف کی ہے۔

Advertisement

Impactful performance at the SCG

️ @iamharis63, @Wasim_Jnr and @IftiAhmed221 review Pakistan’s victory over South Africa #WeHaveWeWill | #T20WorldCup | #PAKvSA pic.twitter.com/AuDjiG1dQZ

— Pakistan Cricket (@TheRealPCB) November 3, 2022

محمد حارث کہتے ہیں کہ نیٹ میں اچھا کھیل رہا تھا جس نے مجھے میچ میں اعتماد دیا اور میں نے ٹیم کے لیے اچھا کرنے کی کوشش کی۔

انہوں نے کہا کہ ’جنوبی افریقہ کے خلاف رضوان بھائی جلدی آؤٹ ہوگئے تھے، اس لیے میں نے پاور پلے کا فائدہ اٹھاتے ہوئے ٹیم کے لیے اچھا کرنے کی کوشش کی‘۔

انہوں نے بتایا کہ جب میں وکٹ پر پہنچا تو کپتان نے مجھے کہا کہ ڈرے بغیر کھیلوں اور بولرز کے بارے میں زیادہ نہ سوچوں، انہوں نے مجھے مشورہ دیا کہ میں اپنا فطری کھیل کھیلوں اور ہر گیند پر اپنی توجہ مرکوز کروں‘۔

انہوں نے مزید بتایا کہ ’میں نے کپتان کی بات کو ذہن میں رکھتے ہوئے بیٹنگ کی اور کامیاب ہوا‘۔

واضح رہے کہ ٹی ٹوئنٹی ورلڈ کپ میں پاکستان کا اگلا میچ اتوار کو بنگلادیش کے خلاف ہوگا جب کہ پاکستان کے لیے یہ میچ جیتنا ضرروی ہے تاہم اگلے مرحلے میں جانے کا فیصلہ گروپ میں موجود بقیہ ٹیموں کے میچز پر منحصر ہے۔