یوکرین پر روس کا درجنوں میزائلوں سے حملہ، ایک شخص ہلاک

By admin On نومبر 15, 2022

انڈونیشیا میں جی 20 سربراہی اجلاس میں یوکرین کے صدر کی ویڈیو لنک تقریر کے بعد روس کے درجنوں میزائلوں نے کیف کو نشانہ بنایا۔

برطانوی خبر رساں ادارے کی رپورٹ کے مطابق انڈونیشیا کے سیاحتی مقام بالی میں ہونے والے جی 20 سربراہی اجلاس میں روس کو سخت مذمت کا سامنا کرنے پر روس نے یوکرین بھر میں اہداف پر درجنوں میزائل داغے۔

یوکرین کے صدر ولادیمیر زیلینسکی کی جی 20 اجلاس میں ویڈیو لنک تقریر کے بعد ہونے والے دھماکوں کی اطلاعات کے بعد شہر کے میئر نے تصدیق کی کہ کیف کے پیچرسک ضلع میں دو میزائل رہائشی عمارتوں سے ٹکرائے ہیں۔

برطانوی میڈیا کے مطابق میزائل حملے میں یوکرین کے پاور اسٹیشنز کو ہدف بنایا گیا تھا، اور میزائل حملے کی وجہ سے 7 ملین افراد بجلی سے محروم ہو گئے ہیں.

بالی میں ہونے والے جی 20 مذاکرات میں روس اور یوکرین ایک دوسرے پر جنگ کو بڑھانے کا الزام لگاتے رہے، جس میں متحارب فریقین نے امن کے لیے اپنی ضروریات طے کی تھیں۔

دارالحکومت کیف میں ہونے والے حملوں میں کم از کم ایک شخص کی ہلاکت کی اطلاع ہے۔

یوکرائنی صدر کے دفتر کا کہنا ہے کہ ملک بھر میں صورت حال نازک ہے

برطانیہ کے وزیر اعظم رشی سنک کا کہنا ہے کہ روس وحشیانہ جنگ چھیڑ رہا ہے اور اسے یوکرین سے باہر نکلنا چاہیے۔

جی 20 کے اعلامیے کے مسودے میں کہا گیا ہے کہ زیادہ تر اراکین یوکرین میں جنگ کی شدید مذمت کرتے ہیں اور یہ کہ یہ عالمی معیشت کی کمزوریوں کو بڑھا رہی ہے۔

جی 20 کے مشترکہ اعلامیے میں کہا گیا ہے کہ ہم کل تک حتمی بیان نہیں دیکھ سکیں گے لیکن روس پہلے ہی اعلان کی سیاست سازی پر حملہ کر چکا ہے۔

سربراہی اجلاس میں روس کی نمائندگی کرنے والے وزیر خارجہ سرگئی لاوروف نے اس سے قبل یوکرین پر بات چیت کے لیے غیر حقیقی شرائط قائم کرنے کا الزام لگایا تھا۔

جی 20 سربراہی اجلاس میں یوکرین کے صدر ولادیمیر زیلنسکی نے ویڈیو لنک کے ذریعے فوری جنگ بند کرنے کا مطالبہ کیا۔

آج کے حملوں کے بعد ٹیلیگرام کی جو ویڈیو شیئر کی ہے، اس میں یوکرین کے صدر ولادیمیر زیلنسکی نے اپنے شہریوں کو امید کا پیغام دینے کی کوشش کی۔

ویڈیو میں یوکرینی صدر نے کہا کہ ہم کام کر رہے ہیں، ہم سب کچھ بحال کر دیں گے اور ہم سب کچھ بچائیں گے۔