آصف علی کا کیچ چھوڑنے پر ارشدیپ سنگھ کے ساتھ بھارتی پرستار کی بدتمیزی

By admin On ستمبر 7, 2022

ٹی ٹوئنٹی ایشیاکپ 2022 کے سپر فور مرحلے کے میچ میں آصف علی کا کیچ چھوڑنے پر ارشدیپ سنگھ کے ساتھ بھارتی پرستار نے بدتمیزی کی ہے۔

بھارتی میڈیا کے مطابق ارشدیپ سنگھ نے ٹی ٹوئنٹی ایشیاکپ 2022 میں سپر فور مرحلے کے پاک بھارت میچ میں آصف علی کا کیچ چھوڑ دیا تھا جس کے بعد انہیں سوشل میڈیا پر کافی تنقید کا نشانہ بنایا گیا۔

رپورٹ کے مطابق ارشدیپ سنگھ کے ویکیپیڈیا پیج کے ساتھ بھی کافی چھیڑ چھاڑ کی گئی ہے، ابھی یہ تنازع ختم نہیں ہوا تھا کہ ارشدیپ سنگھ کو ایک بار پھر بدتمیزی کا سامنا کرنا پڑا ہے۔

ہوا کچھ یوں کہ سپر فور مرحلے میں سری لنکا سے شکست کے بعد جب ارشدیپ سنگھ بھارتی ٹیم کے ساتھ دبئی انٹرنیشنل کرکٹ اسٹیڈیم سے واپس ہوٹل کے لیے روانہ ہورہے تھے تو کھلاڑی ایک ایک کرکے بس میں سوار ہورہے تھے۔

اسی لمحے جب ارشدیپ سنگھ ہوٹل سے باہر گاڑی میں روانہ ہونے کے لیے نکلے تو وہاں کھڑا بھارتی پرستار ان کی ویڈیو بنانے لگا اور اسی دوران اس شخص نے برا بھلا کہنا شروع کردیا۔

بھارتی پرستار کی باتیں سن کر ارشدیپ سنگھ کچھ لمحے کے لیے وہی رکے اور اس شخص کو غصے سے گھورنے لگے جس کے بعد وہ بس میں سوار ہوگئے۔

یہ سب دیکھ کر بھارتی اسپورٹس جرنلسٹ سیخ پا ہوگیا اور اس شخص کی کلاس لینا شروع کردی جس پر وہ شخص گھبرا گیا تاہم اسپورٹس جرنلسٹ نے اس کی شکایت وہاں موجود سیکیورٹی اہلکاروں سے بھی کی۔