ورلڈ کپ 2022 کے آغاز کے لیے عالمی رہنما قطر پہنچ گئے۔

دوحہ پہنچنے والوں میں اقوام متحدہ کے سیکرٹری جنرل انتونیو گوٹیرس، روانڈا کے پال کاگامے، فلسطین کے محمود عباس شامل ہیں۔

اتوار کو ورلڈ کپ شروع ہونے سے قبل عالمی رہنما، سیاست دان، سفارت کار اور شاہی خاندان قطر پہنچنا شروع ہو گئے ہیں ۔

قطر نیوز ایجنسی کے مطابق الجزائر کے صدر عبدالمجید تبون، فلسطینی صدر محمود عباس اور اقوام متحدہ کے سیکرٹری جنرل انتونیو گوتریس ہفتے کے روز دوحہ پہنچے، اس کے بعد روانڈا کے صدر پال کاگامے، جنہیں اتوار کو حماد انٹرنیشنل ایئرپورٹ پر دیکھا گیا۔

اتوار کی شام قطر اور ایکواڈور کے درمیان ہونے والے افتتاحی میچ سے قبل سعودی عرب کے ولی عہد شہزادہ محمد بن سلمان بھی ہفتے کے روز دیر گئے میزبان ملک میں پہنچے۔

شہزادہ محمد کی قطر آمد اس وقت ہوئی جب سعودی عرب اور دوحہ نے جنوری 2021 میں برسوں کے ٹھنڈے تعلقات کے بعد سفارتی تعلقات دوبارہ شروع کیے تھے ۔

گروپ سی میں سعودی عرب کا مقابلہ 22 نومبر کو ارجنٹائن سے ہوگا۔

مصر کے سرکاری ٹی وی نے اتوار کو ایوان صدر کے حوالے سے بتایا کہ مصر کے صدر عبدالفتاح السیسی بھی افتتاحی تقریب میں شرکت کریں گے۔