معروف اماراتی بزنس مین وسابق ڈائریکٹرایڈنوک عبدالرحمن محمد الرومیثی کی جانب سے سفیرپاکستان فیصل نیازترمذی کے اعزازمیں الوداعی عشائیہ۔
یواے ای کے مقامی شہریوں کے علاوہ ممتازشخصیات کی شرکت
ابوظہبی(اردوویکلی)::گزشتہ دنوں معروف اماراتی بزنس مین وسابق ڈائریکٹرایڈنوک عبدالرحمن محمد الرومیثی نے اپنی رہائش گاہ پرمتحدہ عرب امارات میں پاکستان کے سفیر فیصل نیاز ترمذی کے اعزازمیں الوداعی عشائیہ کااہتمام کیا۔ جس میں سفیرعبدالرضاعبداللہ الخوری، محمد عبدالرحمن الرمیثی، عبداللہ محمد الرمیثی، محمد سلطان محمد الرمیثی اور پاکستانی نژاد متحدہ عرب امارات کے شہری حاجی محمداکبرزادت ،چوہدری محمدزمان ریحانیہ،میاں امجد جاوید،امتیازخٹک سمیت مقامی شعرا کرام نے بھی شرکت کی۔عشائیہ کا مقصد سفیرفیصل ترمذی کی متحدہ عرب امارات میں قیام کے دوران یواے ای اور پاکستانی کمیونٹیز کے لیے ان کی خدمات کوخراج تحسین پیش کرناتھا۔
عبدالرحمن رومیثی نے سفیر ترمذی کا پرتپاک استقبال کیا۔ انہوں نے سفیر کا شکریہ ادا کیا اورکہا کہ متحدہ عرب امارات میں اپنی تعیناتی کے دوران انہوں نے اماراتی اور پاکستانی دونوں کمیونٹیز سے اچھے روابط روارکھے۔ انہوں نے متحدہ عرب امارات کے مختلف شعبوں بشمول تعلیم، انفراسٹرکچر، رئیل اسٹیٹ، صحت، سول ایوی ایشن اور دیگر بہت سے شعبوں میں پاکستانی تارکین وطن کے تعمیری کردار اور شراکت پر روشنی ڈالی۔ انہوں نے ابوظہبی بلدیہ کے سابق چیف انجیئیرمرحوم اظہار حیدر کی خدمات کاذکربھی کیا جنہوں نے ابوظہبی بلدیہ میں کئی دہائیوں تک خدمات انجام دیں، انہوں نے اس بات پر زور دیا کہ پاکستانی اور اماراتی کمیونٹیز پیار، بھائی چارے، ثقافتی اور سماجی اقدار کے مضبوط رشتوں میں بندھے ہوئے ہیں۔
اس موقع پر خطاب کرتے ہوئے سفیر فیصل نیاز ترمذی نے جناب الخوری اوررومیثی خاندان کے افراد کی جانب سے گرمجوشی سے مہمان نوازی پر ان کا تہہ دل سے شکریہ ادا کیا۔ انہوں نے متحدہ عرب امارات کے لوگوں سے ملنے والی مثالی محبت اور پیار کو اجاگر کیا۔ متحدہ عرب امارات کے بانی اور پہلے صدر مرحوم شیخ زید بن سلطان النہیان کی گراں قدر خدمات کو یاد کرتے ہوئے سفیر ترمذی نے کہا کہ انہیں پاکستان اورپاکستانیوں سے خصوصی محبت تھی۔ انہوں نے مزید کہا کہ متحدہ عرب امارات کی موجودہ قیادت نے پاکستان میں انفراسٹرکچر، صحت اور ٹیلی کمیونیکیشن سمیت کئی شعبوں کی بہتری پر بھرپور توجہ دی ہے۔ انہوں نے مزید کہا کہ اس سے دونوں ممالک کے درمیان تجارت اور سرمایہ کاری کو فروغ ملا ہے۔
تقریب کے اختتام پر میزبان نے تمام شرکاء کی جانب سے سفیر ترمذی کے لیے نیک تمناؤں کا اظہار کیا اور ان کی اگلی سفارتی ذمہ داری میں مزید کامیابیوں کے لیے نیک خواہشات کااظہارکیا۔
