پاکستان کے سابق کپتان کے پی ایل کے برانڈ ایمبیسیڈر شاہد خان آفریدی نے بھارتی کرکٹ بورڈ کو کہا ہے کہ کے پی ایل اپنے وقت پر ہوگی۔
تفصیلات کے مطابق پاکستان کے سابق کپتان شاہد آفریدی نے بورڈ آف کنٹرول فار کرکٹ ان انڈیا کو پیغام بھیجا کہ کشمیر پریمیئر لیگ رواں سال سفر کے پروگرام میں کسی تبدیلی کے بغیر منعقد کی جائے گی۔
ایک پریس کانفرنس کے دوران شاہد آفریدی نے کہا کہ لیگ نوجوان خواہشمند، ابھرتے ہوئے کرکٹرز کے لیے اپنی صلاحیتوں کا مظاہرہ کرنے کا ایک پلیٹ فارم ہے اور لائم لائٹ حاصل کرنے کا ایک شاندار موقع ہے۔
پریس کانفرنس کے دوران آفریدی سے پوچھا گیا کہ کیا آپ بی سی سی آئی اور ہندوستانی کرکٹ شائقین کو کے پی ایل سیزن 2 کے بارے میں کوئی پیغام دینا چاہیں گے؟
شاہد خان آفریدی نے جواب دیا میں انہیں صرف یہ بتانا چاہتا ہوں کہ کشمیر پریمئیر لیگ سیزن ٹو ہو رہا ہے۔
واضح رہے کہ کشمیر پریمئیر لیگ کے پہلے سیزن 2021 میں بھارتی کرکٹ بورڈ نے غیر ملکی کرکٹرز کو لیگ میں شرکت نہ کرنے کے لئے دباؤ ڈالا تھا جس کی وجہ سے کچھ غیر ملکی کھلاڑیوں نے لیگ سے علیحدگی اختیار کر لی تھی۔
Advertisement
آفریدی نے مزید کہا کہ وہ آئندہ سیزن کے دوران چند میچوں میں ٹیم جموں جانباز کی نمائندگی کریں گے۔
شاہد آفریدی نے مداحوں کی محبت کا اعتراف کرتے ہوئے کہا کہ مداح مجھے اب بھی کھیلتا دیکھنا چاہتے ہیں اور میں ان کی خواہش کو پورا کروں گا۔
کشمیر پریمئیر لیگ کے پہلے ایڈیشن میں آصف آفریدی کو مین آف دی فائنل اور بولر آف دی ٹورنامنٹ سے نوازا گیا۔
پہلے ایڈیشن میں ذیشان اشرف بہترین بلے باز جبکہ وسیم جونیئر کو بہترین فیلڈر کا ایوارڈ دیا گیا تھا۔
بہترین وکٹ کیپر کا ایوارڈ بسم اللہ خان کو دیا گیا تھا جبکہ حسین طلعت کو پلیئر آف دی ٹورنامنٹ کا ایوارڈ ملا تھا۔
کشمیر پریمئیر لیگ کا دوسرا ایڈیشن یکم اگست سے 14 اگست تک مظفرآباد میں کھیلا جائے گا۔
کے پی ایل میں چھ ٹیمیں شریک ہوں گی جن میں راولاکوٹ ہاکس، کوٹلی لائنز، میرپور رائلز، مظفرآباد ٹائیگرز، اوورسیز واریئرز اور باغ اسٹالینز شامل ہیں۔