معین علی کو چند سالوں میں ون ڈے کرکٹ ختم ہونے کا خدشہ

By admin On اگست 7, 2022

انگلینڈ کے آل راؤنڈر معین علی نے خبردار کیا ہے کہ دوسرے کھلاڑی بھی بین اسٹوکس کی طرح ون ڈے انٹرنیشنل کرکٹ چھوڑ سکتے ہیں اور اگر کھیل کے مصروف کیلنڈر کو تبدیل نہیں کیا گیا تو یہ فارمیٹ مکمل طور پر ختم ہوسکتا ہے۔

انگلینڈ کے ٹیسٹ کپتان بین اسٹوکس نے گذشتہ ماہ 31 سال کی عمر میں ون ڈے کرکٹ سے ریٹائرمنٹ کا اعلان کیا تھا جبکہ انہوں نے ریٹائرمنٹ کا اعلان کرتے ہوئے مصروف ترین شیڈول کا بھی حوالہ دیا۔

واضح رہے کہ انٹرنیشنل کرکٹ کونسل کی جانب سے ہر سال ایک عالمی ایونٹ کے انعقاد نے کھلاڑیوں کی مصروفیت کو بھی بڑھادیا ہے۔

انگلش کرکٹر معین علی جو دی ہنڈریڈ میں برمنگھم فینکس کی قیادت کررہے ہیں، اس موقع پر ان کا کہنا تھا کہ میری رائے میں اس وقت یہ پائیدار نہیں ہے۔

انہوں نے کہا کہ ہمیں کچھ کرنا ہوگا کیونکہ 50 اوورز کا فارمیٹ چند سالوں میں ختم ہوتا نظر آرہا ہے، یہ لمبا اور بورنگ فارمیٹ ہے اور اس وقت اس کی کوئی اہمیت نہیں ہے۔

معین علی کہتے ہیں گذشتہ سال کچھ کھلاڑیوں نے ٹیسٹ کرکٹ چھوڑدی جبکہ ٹیسٹ کرکٹ اب بھی تینوں بین الاقوامی فارمیٹس میں سب سے بہتر ہے۔

ان کا کہنا تھا مجھے فکر ہے کہ کھلاڑی زیادہ ٹورنامنٹس ہونے کی وجہ سے ریٹائر ہورہے ہیں اور آپ کو جلد ہی شیڈول کی وجہ سے مزید کھلاڑی بھی ریٹائرمنٹ کا اعلان کرتے دکھائی دیں گے۔

علاوہ ازیں انگلینڈ کے دیگر کھلاڑی جوس بٹلر اور جوروٹ نے بھی شیڈول پر خدشات کا اظہار کیا ہے جبکہ بھارتی اسپنر روی چندرن اشون نے بھی فارمیٹ کی مطابقت پر سوال اٹھایا ہے۔

خیال رہے کہ آئی سی سی نے رواں ہفتے بڑھتی ہوئی تنقید کے باوجود تمام فارمیٹ کے کھلاڑیوں کو برقرار رکھنے کی امید ظاہر کی ہے۔

آئی سی سی کے چیف ایگزیکٹیو جیف ایلار ڈائس نے زور دیتے ہوئے کہا کہ زیادہ تر کھلاڑی اب بھی ورلڈکپ اور آئی سی سی ایونٹس میں کھیلنے کے خواہش مند ہیں۔