شان ٹیٹ نسیم شاہ کی صلاحیتوں کے معترف

By admin On ستمبر 18, 2022

پاکستان کرکٹ ٹیم کے بولنگ کوچ شان ٹیٹ کہتے ہیں کہ نسیم شاہ اس عمر میں مجھ سے زیادہ با صلاحیت بولر ہیں۔

پاکستان کرکٹ ٹیم کے بولنگ کوچ شان ٹیٹ نے کراچی میں پریس کانفرنس کی جس میں انہوں پاکستانی فاسٹ بولرز اور خصوصاً نسیم شاہ کے تعریف کی۔

بولنگ کوچ شان ٹیٹ کہتے ہیں ہمارے پاس بہترین فاسٹ بولرز ہیں اور میرے تمام بولرز کے ساتھ اچھے تعلقات ہیں جب کہ یہ ایک اچھا تجربہ ہے۔

شاہین شاہ کے حوالے سے انہوں نے کہا کہ مجھے شاہین آفریدی کے حوالے سے زیادہ معلومات نہیں، شاہین بہتر ہورہے ہیں صرف اتنا جانتا ہوں۔

ان کا کہنا تھا کہ میں نے ابھی تک وکٹ نہیں دیکھی، ٹی 20 سیریز ہے تو وکٹ بیٹنگ کے لیے اچھی ہوگی۔ مجھے نہیں لگتا پچ کوئی خاص سرپرائز دے گی۔

شان ٹیٹ کا کہنا تھا کہ یہ کھلاڑی دنیا بھر میں کھیلتے ہیں، ہم صرف انہیں اعتماد دے سکتے ہیں۔ مجھے اندازہ ہے کہ فاسٹ بولر کو جب کریمپس ہوتے ہیں تو کتنا درد ہوتا ہے۔

ایشیا کپ میں جب نسیم شاہ کو ٹانگ میں درد ہوا تو میں خود ان کو گراؤنڈ میں لینے گیا۔ نسیم شاہ کے اندر میں اپنی جوانی دیکھتا ہوں لیکن نسیم شاہ اس عمر میں مجھ سے زیادہ با صلاحیت بولر ہیں۔

انہوں نے مزید کہا انگلینڈ کے پاکستان آنے سے یہاں کے لوگ بہت خوش ہیں۔

واضح رہے کہ انگلینڈ کرکٹ ٹیم 17 سال بعد پاکستان کا دورہ کررہی ہے جب کہ اس موقع پر دونوں ٹیموں کے درمیان 7 ٹی ٹوئنٹی میچز پر مشتمل سیریز کھیلی جائے گی۔

سیریز کے پہلے چار میچ کراچی میں کھیلے جائیں گے جب کہ بقیہ تین میچز لاہور میں ہوں گے۔ کراچی میں 20، 22، 23 اور 25 ستمبر کو میچز ہوں گے جب کہ لاہور میں 28، 30 ستمبر اور 2 اکتوبرکو میچز ہوں گے۔