ٹی ٹوئنٹی ورلڈ کپ، آسٹریلیا میں ایئر ٹکٹس اور ہوٹلز کے دام مہنگے ہوگئے

By admin On نومبر 6, 2022

پاکستان اور بھارت کے سیمی فائنل میں پہنچنے کے بعد آسٹریلیا میں ایئر ٹکٹس اور ہوٹلز کے دام مہنگے ہوگئے ہیں۔

آئی سی سی ٹی ٹوئنٹی ورلڈ کپ کے سپر 12 مرحلے کے میچز اختتام پذیر ہوگئے ہیں جس کے بعد اب سمی فائنل اور فائنل میچز ہونا باقی ہیں۔

گروپ 1 سے نیوزی لینڈ اور انگلینڈ کی ٹیمیں سیمی فائنل میں پہنچی ہیں جب کہ گروپ 2 سے پاکستان اور بھارت نے سیمی فائنل میں جگہ بنائی ہے۔

بھارت اور بالخصوص پاکستان کے سیمی فائنل میں پہنچنے کے بعد سڈنی اور ایڈیلیڈ اوول میں ہوٹلز کے دام آسمان سے باتیں کرنے لگے ہیں۔

رپورٹس کے مطابق ایڈیلیڈ سے سڈنی کی فلائٹس ٹکٹس میں 3 گنا اضافہ ہوگیا ہے جو ٹکٹس پہلے 200 آسٹریلوی ڈالر میں دستیاب تھے، اس کی قیمت اب 600 ڈالر تک پہنچ گئی ہے۔

وہیں سڈنی اور ایڈیلیڈ میں موجود ہوٹلز کی قیمتوں میں بے پناہ اضافہ ہوگیا ہے جب کہ کئی ہوٹلز میں تو اب کمرے بھی دستیاب نہیں۔

رپورٹس ہیں کہ پاکستانی اور بھارتی فینز کی ایک بڑی تعداد ان شہروں کا رخ کررہی ہے جس کے باعث قیمتوں میں اضافہ دیکھا گیا ہے۔

واضح رہے کہ ٹی ٹوئنٹی ورلڈ کپ کا پہلا سیمی فائنل میچ پاکستان اور نیوزی لینڈ کے درمیان 9 نومبر بروز بدھ کو سڈنی میں کھیلا جائے گا۔

دوسرا سیمی فائنل میچ بھارت اور انگلینڈ کی ٹیموں کے درمیان ہوگا جو 10 نومبر بروز جمعرات کو ایڈیلیڈ اوول میں کھیلا جانا ہے۔

یاد رہے کہ پاکستان نے 5 وکٹوں سے بنگلادیش کو شکست دینے کے بعد سیمی فائنل میں اپنی جگہ بنائی ہے جب کہ بھارت، نیوزی لینڈ اور انگلینڈ پہلے ہی سیمی فائنل تک رسائی حاصل کرچکے تھے۔