عارف نظامی کے انتقال پرپی جے ایف یواے ای کا تعزیتی اجلاس

                            عارف نظامی کے انتقال سے  پاکستانی صحافت کا بڑا باب بند ہو گیا(اشفاق احمد)۔

                   عارف نظامی نے ساری عمر صاف ستھری صحافت کی(طاہرمنیرطاہر)۔

انہوں نے صحت مند صحافت کو جرأت کے ساتھ فروغ دیا(مظفررضوی)۔

وہ ایک نڈراوربیباک تجزیہ نگارتھے(سہیل خاور)۔

دبئی(اردوویکلی)::گزشتہ دنوں پاکستانی صحافت کے مایہ ناز ستون عارف نظامی 73برس کی عمرمیں قضائے الہی سے انتقال فرماگئے(اناللہ واناالیہ راجعون)عارف نظامی عارضہ قلب کے علاج کے سلسلے میں دوہفتوں سے لاہور کے ایک مقامی ہسپتال میں داخل تھے۔انکی وفات کی خبرنہ صرف پاکستان بلکہ متحدہ عرب امارات اورپوری دنیا کے صحافتی حلقوں میں نہائت دکھ سے سنی گئی ۔ مرحوم عارف نظامی کے ایصال ثواب اور دعائے مغفرت کے لیے پاکستان جرنلسٹس فورم یو اے ای کا ایک خصوصی تعزیتی اجلاس پاکستان ایسوسی ایشند دبئی میں منعقد ہوا جس کی صدارت پاکستان جرنلسٹ فورم یواے ای کے صدراشفاق احمد نے کی۔ تعزیتی اجلاس میں سینئیرصحافی سہیل خاور، طاہر منیر طاہر،اعجازاحمدگوندل،جمیل خان، خالد محمود گوندل، راجہ محمد نعیم،  ڈاکٹر نسیم صابر، جبکہ مظفررضوی، شیراز مغل،چوہدری ارشد اورزمرد بونیری نے زوم کانفرنس کے ذریعے شرکت کی۔تعزیتی اجلاس میں سہیل خاور،طاہرمنیرطاہر،چوہدری ارشد،جمیل خان،شیرازمغل،اوردیگرحاضرین نے اظہارخیال کیااور عارف نظامی کی صحافتی خدمات پرشاندارالفاظ میں خراج تحسین پیش کیا۔

 تعزیتی اجلاس میں مقامی انگریزی اخبار گلف نیوزکے سینئیرایڈیٹروصدرپی جے ایف یواے ای اشفاق احمد اوربزنس نیوزایڈیٹرخلیج ٹائمزمظفر رضوی نے عارفی نظامی مرحوم کے ساتھ گزرے وقت اور ان کے ساتھ کام کرنے کا ذکر کرتے ہوئے کہا کہ عارف نظامی ایک نڈرصحافی تھے کسی بھی خاص اور حساس نوعیت کی خبر کی اشاعت کے بعد اس کا سارا پریشر اپنے اوپر لے لیتے اورکبھی بھی اپنے رپورٹر پر کوئی دباﺅ نہیں آنے دیتے تھے۔انہوں نے مصالحہ دار خبروں کی بجائےہمیشہ معیاری اور جاندار خبروں کی اشاعت کومقدم رکھا۔ان کی خبروں میں جان ہوتی تھی۔ انہوں نے  ہمیشہ صحت مند صحافت کو پوری جرأت کے ساتھ فروغ دیا وہ حالات حاضرہ پر گہری نظررکھتے تھے جس کی وجہ سے انکی بیشترخبریں سچ ثابت ہوتیں۔مرحوم2013 میں نگران وفاقی وزیربرائے اطلاعات وپوسٹل سروسز کے منصب پر بھی فائز رہے ،عارف نظامی انگریزی اخبار پاکستان ٹوڈے کے بانی و ایڈیٹر اور نوائے وقت اخبار گروپ کے بانی حمید نظامی مرحوم کے بیٹے تھے ،انگریزی اخباردی نیشن میں طویل عرصہ صحافتی خدمات بھی سرانجام دیں۔مرحوم نے مختلف ٹی وی چینلزپربڑے نپے تلے تجزیئے پیش کیئے۔یقیناًعارف نظامی کی وفات سے صحافتی دنیامیں ایک خلاپیداہوگیاہے جوہمیشہ محسوس کیاجاتارہے گا۔پاکستان جرنلسٹس فورم یواے ای کے تعزیتی اجلاس میں مرحوم عارف نظامی کی مغفرت کے لیئے خصوصی دعاکی گئی اورلواحقین کے لیئے صبرجمیل کی دعاکی گئی اور عارف نظامی کے اہل خانہ سے گہرے دکھ  اور افسوس کااظہارکیاگیااللہ تعالی سوگواران کویہ صدمہ برداشت کرنے کی توفیق عطافرمائے آمین