ڈائریکٹرجنرل ابوظبی چیمبر اور سفیرپاکستان کاکاروباری تعاون بڑھانے پر تبادلہ خیال۔
ابوظہبی(اردوویکلی)::ڈائریکٹر جنرل ابوظبی چیمبر آف کامرس اینڈ انڈسٹری محمد ہلال المحیری نے متحدہ عرب امارات میں پاکستان کے سفیر جناب افضال محمود سے ابوظبی چیمبرہیڈ کوارٹر میں ملاقات کی۔ ملاقات میں ابوظبی اور پاکستان میں کاروباری اداروں کے درمیان تعاون بڑھانے کے امکانات پر تبادلہ خیال کیا گیا۔ محمد ہلال المحیری نے متحدہ عرب امارات اور پاکستان کے درمیان مضبوط معاشی اور تجارتی تعلقات کو اجاگر کیا اور کہاکہ دونوں ممالک کے درمیان تجارتی حجم ان گہرے تعلقات کی عکاسی کرتا ہے ۔ انھوں نے کہا کہ ابوظبی چیمبر پاکستانی کاروباری اداروں اور افراد کو ابوظبی میں سرمایہ کاری کے بہترین مواقع تلاش کرنے کے لیے درکار تمام خدمات پیش کرنے کیلئے مکمل طور پرتیار ہے۔ سفیرپاکستان افضال محمود نے ابوظبی اور پاکستان میں کاروباری اداروں کے درمیان تجارتی تعلقات کو مضبوط بنانے میں ابوظبی چیمبر کے کردار کی تعریف کی۔ انہوں نے ابوظبی میں بزنس گروپس اور متحدہ عرب امارات اور پاکستان کے درمیان معاشی تعاون بڑھانے کی اہمیت پر زور دیا۔ سفیرافضال محمود نے کہاکہ حکومت پاکستان نے اہم تجارتی شعبوں میں امید افزا مواقع تلاش کرنے کے لیے غیر ملکی سرمایہ کاروں کو راغب کرنے کے لیے کئی شاندار اقدامات کیےہیں ۔ افضل محمود نے کہا کہ دنیا کے بیشتر ممالک کو ایکسپو 2020 دبئی میں شرکت کے ذریعے قیمتی سرمایہ کاری اور شراکت داری کا موقع ملے گا۔ ملاقات میں ابو ظبی چیمبر کے ڈپٹی ڈائریکٹر جنرل عبداللہ ثور القبیسی اور ہلال محمد الحمیلی بھی مو جود تھے۔(نیوزوتصاویربشکریہ وام)۔
