پاکستان کے سابق فاسٹ بولر عاقب جاوید کا کہنا ہے کہ پاکستان کرکٹ بورڈ(پی سی بی) کے چیئرمین رمیز راجہ کو سابق وزیراعظم عمران خان کی معزول حکومت کے ساتھ مستعفی ہو جانا چاہیے تھا۔
تفصیلات کے مطابق عاقب جاوید، جو اس وقت پی ایس ایل فرنچائز لاہور قلندرز سے وابستہ ہیں، نے کہا کہ رمیز پچھلی حکومت کے نمائندے ہیں اور انہیں اب تک استعفیٰ دے دینا چاہیے تھا۔
ان کا کہنا تھا کہ میں بغیر کسی وجہ کے رمیز راجہ کے خلاف نہیں ہوںہم سب ساتھی ہیں، لوگ ہماری بات سنتے ہیں اور ہماری عزت کرتے ہیں اگر ایسا ہے تو ہمیں اخلاقیات کا بھی مظاہرہ کرنا چاہیے۔
عاقب جاوید کا کہنا تھا کہ ہم نے احسان مانی کا اچھا کام کرنے کا انتظار کیا، لیکن وہ اور وسیم خان ن تین سالوں میں پاکستان کرکٹ کو بہت نیچے لے گئے، اور نیچے جانے کی وجہ بورڈ میں بیٹھے لوگ ہوں گے۔
سابق فاسٹ بولر نے کہا کہ رمیزراجہ نے سابقہ بورڈ کی پالیسی کے ساتھ کوئی چھیڑ چھاڑ نہیں کی اور نہ ہی کسی ملازم کو نوکری سے نکالا اور لوگوں کو بھاری تنخواہیں ملتی ہیں لیکن کچھ نہیں کرتے۔
عاقب جاوید پاکستان جونیئر لیگ کرانے کے خیال کے بھی خلاف ہیں، جو 1 سے 15 اکتوبر تک قذافی اسٹیڈیم میں کھیلی جانی ہے اور اس کے بجائے وہ اس سطح پر مزید دو روزہ میچ دیکھنا چاہتے ہیں۔
انہوں نے مزید کہا کہ پی سی بی کو خواتین کرکٹ کے مزید مقابلے کرانے پر توجہ دینی چاہیے تاکہ معیار بہتر ہو سکے۔