لاہور: سابق اولمپئن رشید الحسن نے پی ایچ ایف صدر اور سیکرٹری سے مستعفی ہونے کا مطالبہ کردیا ہے۔
تفصیلات کے مطابق پاکستان ہاکی ٹیم کی ایشیا کپ میں ناقص کارکردگی کے بعد سابق اولمپئن رشید الحسن نے پی ایچ ایف کے صدر اور سیکرٹری سے مستعفی ہونے کا مطالبہ کردیا ہے۔
سابق اولمپئن رشید الحسن کا کہنا ہے کہ قومی ہاکی ٹیم کی مینجمنٹ بھی فوری طور پر عہدے چھوڑ دے، وزیر اعظم پاکستان میاں محمد شہباز شریف فوری طور اس بات کا نوٹس لیں۔
ان کا مزید کہنا تھا کہ افسوس ہوا کہ پاکستان ہاکی ٹیم ایشیا کپ کے ٹائٹل اور ورلڈ کپ سے باہر ہوگئی ہے۔
Advertisement
واضح رہے کہ سابق اولمپئن رشید الحسن کو سابق وزیر اعظم عمران خان پر تنقید کرنا بھاری پڑگئی تھی جبکہ انہیں 10 سال کی پابندی کا سامنا ہے۔
خیال رہے کہ ایشیا کپ کے پول میں تیسری پوزیشن پانے والی پاکستانی ٹیم ایشیا کپ کے ساتھ ساتھ جنوری میں بھارت میں شیڈول ورلڈکپ سے بھی باہر ہوچکی ہے جبکہ قومی ٹیم کا اب اگلا ہدف کامن ویلتھ گیمز ہیں۔
قومی ٹیم ایشیا کپ میں شرکت کے بعد تین جون کو واپس وطن پہنچے گی تاہم ہیڈکوچ سیگفرایڈ ایکمین ٹیم کے ساتھ واپس نہیں آئیں گے، وہ کچھ وقت اہل خانہ کے ساتھ ہالینڈ میں گزاریں گے۔
ذرائع کا کہنا ہے کہ قومی ٹیم کی وطن واپسی کے بعد کھلاڑیوں کو دو ہفتوں کا بریک دیا جائے گا جس کے بعد ایک بارپھر کیمپ لگایا جائے گا۔
برمنگھم کامن ویلتھ گیمز کا آغاز اٹھائیس جولائی سے ہورہا ہے جس کے لیے اکتیس مئی تک ہاکی فیڈریشن کو حتمی کھلاڑیوں کے نام پاکستان اولمپک ایسوسی ایشن کو بھجوانے ہیں۔