کاؤنٹی کرکٹ نے نسیم شاہ کی صلاحیتوں کو مزید نکھار دیا
پاکستان کے نوجوان فاسٹ بولر نسیم شاہ نے عزم کا اظہار کیا ہے کہ کاؤنٹی کے تجربے سے بین الاقوامی میچز میں پرفارمنس کا گراف پہلے سے اب زیادہ ہوگا۔
کرکٹ کے خبر رساں ادارے کو انٹرویو دیتے ہوئے نسیم شاہ کا کہنا تھا کہ کاؤنٹی کرکٹ جیسا زبردست ماحول پہلے کبھی نہیں دیکھا، یہاں کے گراؤنڈ، آؤٹ فیلڈ بہت شاندار ہیں۔
ان کا کہنا تھا کہ ایسی کنڈیشنز ایک فاسٹ بولر کے لیے آئیڈیل ہوتی ہیں ور ایسی کنڈیشنز میں ایک بولر گیند کرواتے ہوئے بہت انجوائے کرتا ہے۔
انہوں نے کہا کہ میں نے اپنی کرکٹ پہاڑوں اور ناہموار زمین پر کھیلنا شروع کی جبکہ انگلینڈ میں رہنے والے نوجوان خوش قسمت ہیں کہ کیونکہ انھیں کم عمری میں ہمارے جیسے مسائل کا سامنا نہیں کرنا پڑتا۔
Advertisement
فاسٹ بولر کہتے ہیں انگلینڈ میں رہنے والے نوجوان کرکٹر بہترین سہولیات میں اپنی کرکٹ کا آغاز کرتے ہیں جبکہ پاکستانی جتنے محنتی اور باصلاحیت ہیں، انھیں انگلینڈ جیسی سہولیات، ماحول اور پچز پاکستان میں بھی میئسر ہوں تو ہماری کرکٹ بہت اوپر جاسکتی ہے۔
نسیم شاہ کا کہنا تھا کہ مجھے فخر ہے کہ کاؤنٹی کرکٹ کھیل کر خود کو مزید بہتر بنانے کا موقع ملا ہے، اس تجربے سے بین الاقوامی میچز میں پرفارمنس کا گراف پہلے سے اب زیادہ ہوگا۔
انہوں نے کہا کہ میں تو ہر فارمیٹ میں کھیلنے کا خواہشمند ہوں، ٹیم مینجمنٹ اور سلیکٹرز جہاں بہتر خیال کرتے ہیں، وہ مجھے استعمال کرتے ہیں، میرا کام پرفارم کرنا اور جب بھی موقع ملتا ہے تو میں پہلے سے زیادہ کارکردگی دکھانے کی کوشش کرتا ہوں۔
واضح رہے کہ نسیم شاہ اب تک صرف ٹیسٹ میچز میں ہی ملک کی نمائندگی کرسکے ہیں جبکہ انہوں نے 11 ٹیسٹ میچز میں 1019 دے کر 26 وکٹیں حاصل کی ہیں۔