سپر لیگ رینکنگ؛ پاکستان کی چوتھی پوزیشن بھی خطرے میں پڑگئی
پاکستان کی آئی سی سی سپر لیگ میں چوتھی پوزیشن خطرے میں پڑگئی ہے جو ورلڈ کپ 2023 کے لیے کوالیفائنگ کا درجہ رکھتی ہے۔
تفصیلات کے مطابق نیوزی لینڈ نے پاکستان کے لیے خطرے کی گھنٹی بجادی ہے جبکہ نیوزی لینڈ نے آئرلینڈ کے خلاف منگل کو کھیلے گئے دوسرے میچ میں 3 وکٹوں سے کامیابی حاصل کرلی ہے۔
آئرلینڈ کو شکست دینے کے بعد نیوزی لینڈ کی ٹیم 80 پوائنٹس کے ساتھ سپر لیگ میں پانچویں پوزیشن پر آگئی ہے۔
پہلےمیچ میں نیوزی لینڈ کی ٹیم کو آئرش ٹیم کے خلاف کافی مشکلات پیش آئی تھیں لیکن کیوی ٹیم اپ سیٹ شکست سے بال بال بچ گئی تھی جبکہ نیوزی لینڈ کو سیریز میں 0-2 کی فیصلہ کن برتری حاصل ہے۔
Advertisement
اگر نیوزی لینڈ کی ٹیم تیسرے اور آخری میچ میں بھی آئرلینڈ کو شکست دے دیتی ہے تو ان کے پوائنٹس چوتھے نمبر پر موجود پاکستان کے برابر 90 ہوجائیں گے۔
پاکستان ٹیم نے 15 میچز کھیل کر یہ پوائنٹس حاصل کیے ہیں جبکہ نیوزی لینڈ صرف 8 میچز کھیل کر 90 پوائنٹس حاصل کرلے گا جس کے بعد وہ مزید ایک فتح سے پاکستان سے آگے نکل جائے گا۔
واضح رہے کہ سپر لیگ میں انگلینڈ کی ٹیم 125 پوائنٹس کے ساتھ بدستور پہلے نمبر پر موجود ہے جبکہ 120 پوائنٹس کے ساتھ بنگلادیش دوسرے اور 100 پوائنٹس کے ساتھ افغانستان کی ٹیم تیسرے نمبر پر موجود ہے۔
اس فہرست میں بھارت کا ساتواں نمبر ہے جو 12 میچز میں 79 پوائنٹس حاصل کرنے میں کامیاب رہا ہے۔