کامن ویلتھ گیمز کے لیے پاکستان ہاکی ٹیم کے مینجر تبدیل
لاہور: کامن ویلتھ گیمز کے لیے پاکستان ہاکی ٹیم کے مینجر اجمل لودھی کو تبدیل کردیا گیا ہے۔
تفصیلات کے مطابق پاکستان ہاکی ٹیم کے مینجر اجمل لودھی نے بیٹے کی علالت کے باعث معذرت کرلی ہے جس کے بعد پی ایچ ایف نے کوچ سمیر حسین کو مینجر کی ذمہ داریاں سونپ دی ہیں۔
واضح رہے کہ پی ایچ ایف نے اجمل لودھی کو خواجہ جنید کے مستعفی ہونے پر مینجر مقرر کیا تھا۔
دوسری جانب قومی ہاکی ٹیم کا کیمپ ان دنوں لاہور میں جاری ہے جبکہ ویزا سمیت تمام سفری انتظامات مکمل کرلیے گئے ہیں۔
Advertisement
کھلاڑی ڈیلی الاؤنس کے منتظر ہیں جبکہ پاکستان ٹیم عمر بھٹہ کی قیادت میں چوبیس جولائی کو اسلام آباد سے برمنگھم کے لیے روانہ ہوگی۔
خیال رہے کہ کامن ویلتھ گیمز میں پاکستان کا 103 رکنی دستہ شرکت کرے گا جس میں 56 کھلاڑیوں کے اخراجات پاکستان اسپورٹس بورڈ برداشت کرے گا جبکہ 27 کھلاڑیوں اور آفیشلز کے اخراجات پی او اے اور نیشنل فیڈریشنز برداشت کرے گی۔
بیڈمنٹن کھلاڑیوں کی دستے میں واپسی ہوئی ہے جن کے اخراجات پی ایس بی کی جگہ پاکستان اولمپک ایسوسی ایشن برداشت کرے گی۔
ویمن کرکٹ ٹیم کے 20 رکنی دستے کے اخراجات پی سی بی برداشت کرے گا جبکہ پاکستانی ایتھلیٹس 13 گیمز میں حصہ لیں گے۔
یاد رہے کہ برمنگھم کامن ویلتھ گیمز 28 جولائی سے 8 اگست تک شیڈول ہے جس میں شرکت اکے لیے قومی دستہ 23 جولائی کو برمنگھم روانہ ہوگا۔