عبداللہ شفیق نے جاوید میانداد کا ریکارڈ توڑ دیا
گال: عبداللہ شفیق نے سری لنکا کے خلاف 342 رنز کے بڑے ہدف کا تعاقب کرتے ہوئے شاندار سنچری کی بدولت جاوید میانداد کا ریکارڈ توڑ دیا ہے۔
پاکستان کرکٹ ٹیم کے اوپننگ بلے باز عبداللہ شفیق نے سابق لیجنڈری بلے باز اور سابق کپتان جاوید میانداد کا پہلے چھ ٹیسٹ میچز میں سب سے زیادہ رنز بنانے کا ریکارڈ توڑ دیا ہے۔
چوتھے دن کے کھیل کے اختتام تک انہوں نے 112 رنز کی اننگز کھیل کر یہ ریکارڈ توڑا ہے۔
پہلے چھ ٹیسٹ میچز میں میانداد نے 652 رنز بنا کر یہ ریکارڈ اپنے نام کیا تھا جبکہ عبداللہ شفیق پہلے چھ ٹیسٹ میچز میں اب تک 672 رنز اسکور کرچکے ہیں اور پانچویں دن کا کھیل اب بھی باقی ہے جس میں وہ مزید رنز کرسکتے ہیں۔
Advertisement
https://twitter.com/TheRealPCB/status/1549381860274348032
واضح رہے کہ پاکستان اور سری لنکا کی کرکٹ ٹیموں کے درمیان گال میں پہلا ٹیسٹ میچ جاری ہے جس میں سری لنکا نے پاکستان کو جیت کے لیے 342 رنز کا ہدف دیا ہے۔
پاکستان کو جیت کے لیے اب بھی 113 رنز درکار ہیں جبکہ پاکستان کے پاس 7 کھلاڑی باقی ہیں اور عبداللہ شفیق کے ساتھ محمد رضوان کریز پر موجود ہیں۔
گذشتہ روز کھیل کے اختتام تک پاکستان نے 3 وکٹوں کے نقصان پر 222 رنز اسکور کرلیے تھے جبکہ پانچویں دن پاکستان نے مزید اسکور کو بڑھاتے ہوئے 229 رنز کرلیے ہیں۔