سالانہ دیکھ بھال اور مرمت کے باعث نارتھ اسٹریم پائپ لائن کے ذریعے روس سے یورپ کو گیس کی سپلائی بند کر دی تھی تاہم، اب روس نے اس راستے گیس سپلائی بحال کر دی ہے۔
جرمنی کی فیڈرل نیٹ ورک ایجنسی کے صدر کلاؤس میولر نے ٹوئٹر پر بتایا کہ یہ پائپ لائن اس وقت اپنی تقریباً تیس فیصد صلاحیت پر کام کر رہی ہے اور اس مقدار کے لیے بھی محض دو گھنٹے تک ہی کی ضمانت دی گئی ہے۔ ایک دن کے اندر اندر سپلائی کی شرح میں تبدیلی آنا غیر معمولی بات ہے۔
جرمنی نے کریملن پر توانائی کو بطور ہتھیار استعمال کرنے کا الزام بھی لگایا ہے۔
یورپی کمیشن نے بدھ کے روز یورپی یونین کے ممالک پر زور دیا تھا کہ وہ آئندہ موسم سرما کے مہینوں میں قدرتی گیس کی اپنی ہاں طلب میں 15 فیصد تک کی کمی کریں اور اگر روس گیس کی لائف لائن کو منقطع بھی کر دیتا ہے تو اس صورت میں یورپی کمیشن کو مطلوبہ طلب میں کمی کرنے سے متعلق خصوصی اختیارات دیے جائیں۔
یورپی کمیشن کی صدر اُرزُولا فان ڈئر لاین کا کہنا تھا کہ روس توانائی کو بطور ہتھیار استعمال کر رہا ہے اور اسی لیے کسی بھی صورت میں چاہے یہ روسی گیس کی جزوی کٹوتی ہو یا مکمل کٹ آف، یورپ کو تیار رہنے کی ضرورت ہے۔
Advertisement
جرمن چانسلر اولاف شولز نے رواں ہفتے کے آغاز پر میڈیا سے گفتگو کرتے ہوئے کہا کہ ماسکو اناج اور توانائی کی ترسیل کو بطور ہتھیار استعمال کرنے سے باز نہیں آ رہا۔ ہمیں اپنی حفاظت کے لیے پر عزم رہنا چاہیے۔
دوسری جانب، روسی صدر پیوٹن نے سپلائی کے مسائل کی تمام تر ذمہ داری مغربی ممالک کی جانب سے روس پر عائد کردہ پابندیوں پر ڈالی ہے۔