چینی صدر نے توئیوان کے معاملے پر امریکہ کو خبردار کردیا

By admin On جولائی 29, 2022

امریکی صدر جوبائیڈن اور چینی صدر کے درمیان ٹیلی فونک رابطہ ہوا جس میں دونوں کے درمیان طویل گفتگو ہوئی ہے۔

غیر ملکی خبر رساں ایجنسی کے مطابق چینی صدر شی جن پنگ کی امریکی صدر جوبائیڈن سے 2 گھنٹے اور 17 منٹ کی طویل گفتگو ہوئی جس میں چینی صدر نے توئیوان کے معاملے پر امریکہ کو خبردار کردیا ہے۔

چینی صدر نے جوبائیڈن کو خبردار کرتے ہوئے کہا کہ جو لوگ آگ سے کھیلتے ہیں وہ بلآخر جل جاتے ہیں، امریکہ کو چین کے اصولوں کی پاسداری کرنی چاہیے۔

رپورٹ کے مطابق امریکی صدر جوبائیڈن کا کہنا تھا کہ امریکہ تائیوان میں امن و استحکام کو نقصان پہنچانے کی کوششوں کی حفاظت کرتا ہے۔

رپورٹ میں مزید کہا گیا ہے کہ گفتگو کے دوران بائیڈن اور شی جن پنگ نے براہ راست ملاقات کی اہمیت پر بھی تبادلہ خیال کیا ہے جبکہ اس بات پر اتفاق کیا گیا ہے کہ دونوں کی ٹیمیں باہمی طور پر متفقہ وقت تلاش کرنے کے لیے کام کریں گی۔

واضح رہے کہ صدر جو بائیڈن کے اقتدار سنبھالنے کے بعد یہ دونوں رہنماؤں کے درمیان پانچواں ٹیلی فونک رابطہ تھا جبکہ اس ٹیلی فونک کال کو دنیا کی دو بڑی اقتصادی قوتوں کے درمیان کئی تنازعات پر ایک مضبوط تبادلہ خیال قرار دیا گیا ہے۔

خیال رہے کہ تائیوان ایک جمہوری ملک ہے جس کے امریکہ کے ساتھ قریبی تعلقات ہیں لیکن چین تائیوان کو اپنا حصہ سمجھتا ہے اور یہی وجہ ہے کہ دونوں ممالک کے درمیان تائیوان کے معاملے پر کشیدگی پائی جاتی ہے۔

دوسری جانب چینی حکومت امریکی ایوان نمائندگان کی اسپیکر نینسی پیلوسی کے تائیوان کے متوقع دورے پر بھی برہم ہے جبکہ چین نے بدھ کو خبردار کیا تھا کہ اگر نینسی پیلوسی تائیوان کا دورہ کرتی ہیں تو واشنگٹن کو اس کے نتائج بھگتنا ہوں گے۔