انگلینڈ کے شہر برمنگھم میں جاری کامن ویلتھ گیمز میں پاکستانی اتھلیٹس کا مایوس کن آغاز کیا اور گیمز کے پہلے دن تین مقابلوں سے باہر ہو گئے۔
تفصیلات کے مطابق پاکستانی اتھلیٹس نے پہلے دن سوئمنگ، باکسنگ اور جمناسٹک کے مقابلوں میں حصہ لیا لیکن ناقص کارکردگی کے باعث اگلے مرحلے تک رسائی حاصل کرنے میں ناکام رہے۔
پاکستانی سوئمر حسیب طارق جو اپنے راؤنڈ میں سرفہرست تھے مگر وہ کوالیفائی نہ کر سکے، جبکہ سو میٹر بٹر فلائی میں پاکستانی سوئمر بسمہ خان بھی کوئی خاص کارکردگی دکھانے میں ناکام رہی، بسمہ خان مقابلے میں 38 میں سے 31 نمبر پر مقابلہ ختم کیا۔
پاکستان کی تیسری سوئمر جہاں آرا نے بھی ساتھ کھلاڑیوں کی تقلید کی اور دو سو میٹر فری اسٹائل میں 30 سوئمرز میں 22 واں نمبر حاصل کیا۔
پاکستانی دستے کی ایک اور اتھلیٹ مشال کا بھی 33 اتھلیٹس کے مقابلوں میں 31 واں نمبر رہا، جبکہ باکسنگ میں پاکستانی باکسر سلیمان بلوچ روایتی حریف بھارتی باکسر کے خلاف راؤنڈ آف سکسٹین میں شکست سے دوچار ہوئے۔
Advertisement
پاکستانی اتھلیٹس اور آفیشلز نے کامن ویلتھ گیمز کے شیکلٹن ولیج برمنگھم میں نماز جمعہ بھی ادا کیا، جس میں حافظ محمد عبداللہ نے امامت کے فرائض انجام دیئے۔
قومی ہاکی ٹیم کے کپتان عمر بھٹہ، مینجر سمیر حسین سمیت ہاکی ٹیم نے بھی نماز جمعہ ادا کی۔
واضح رہے کہ پاکستان خواتین کرکٹ ٹیم کامن ویلتھ گیمز میں اپنی مہم کا آغاز آج بارباڈوس کے خلاف میچ سے کرے گی۔
Advertisement