اسرائیل میں بس پر حملہ، چھ فوجی زخمی

By admin On ستمبر 4, 2022

اسرائیل میں بس پر فائرنگ سے چھ فوجی زخمی ہوگئے ہیں جن میں ایک کی حالت تشویش ناک بتائی جارہی ہے۔

غیر ملکی خبر رساں ادارے کے مطابق اسرائیلی فوج کا کہنا ہے کہ فلسطینی حملہ آوروں نے مغربی کنارے کے علاقے میں بس پر حملہ کیا جس میں چھ فوجیوں سمیت ایک عام شہری بھی زخمی ہوگیا ہے۔

اسرائیلی فوج کے مطابق اس حملے کے شبے میں دو فلسطینیوں کو حراست میں لیا گیا ہے جب کہ فائرنگ کے بعد مشتبہ افراد نے اپنی گاڑی میں فرار ہونے کی کوشش کی تھی۔

رپورٹ کے مطابق مشتبہ افراد کی گاڑی کو آگ لگی تھی جس کی وجہ تاحال معلوم نہیں ہوسکی ہے جب کہ اسرائیلی میڈیا پر جاری کی گئی فوٹیج میں دیکھا گیا ہے کہ جیسے ہی مشتبہ افراد اپنی جلتی گاڑی سے اترے تو پولیس نے انہیں گرفتار کرلیا۔

اسرائیلی وزیر دفاع بینی گینز کا کہنا ہے کہ اسرائیلی پولیس نے انتہائی پیشہ ورانہ انداز میں مستعدی کے ساتھ مشتبہ افراد کو گرفتار کیا ہے۔

واضح رہے کہ یہ واقع اسرائیل کے مغربی کنارے کو اردن سے ملانے والی مرکزی شاہراہ روٹ 90 پر پیش آیا ہے جب کہ اسرائیل نے 1967 کی عرب اسرائیل جنگ میں مغربی کنارے کے علاقے پر قبضہ کیا تھا۔

شاہراہ کے اطراف میں اسرائیلی آباد کاروں کی بستیاں اور فلسطینی گاؤں و قصبے موجود ہیں جب کہ اسرائیل نے 1967 کے بعد یہاں اپنے شہریوں کی آباد کاری شروع کی تھی۔

یاد رہے کہ اس آباد کاری کو عالمی برادری کی اکثریت غیر قانونی قرار دیتی ہے اور اسے مسئلہ فلسطین کے حل کی راہ میں رکاوٹ سمجھتی ہے۔