ابوظہبی فنڈ فار ڈویلپمنٹ کے ڈائریکٹر جنرل محمد سیف السویدی سے سفیرپاکستان فیصل نیاز ترمذی کی الوداعی ملاقات
ابوظہبی(نیوزڈیسک)::متحدہ عرب امارات میں پاکستان کے سفیر فیصل نیاز ترمذی نے آج ابوظہبی فنڈ فار ڈویلپمنٹ کے ڈائریکٹر جنرل محمد سیف السویدی سے الوداعی ملاقات کی۔ سفیر ترمذی نے پاکستان کے ترقیاتی اقدامات کے لیےابوظہبی فنڈ فار ڈویلپمنٹ کی طرف سے دی جانے والی مسلسل حمایت کی تعریف کی۔ انہوں نے سماجی و اقتصادی ترقی کو آگے بڑھانے اور پاکستان اور متحدہ عرب امارات کے درمیان دوطرفہ تعاون کو مضبوط بنانے میں فنڈ کے اہم کردار کو اجاگر کیا۔
جناب محمدسیف السویدی نے دو طرفہ تعاون بالخصوص اقتصادی ترقی اور سرمایہ کاری کے شعبوں میں بڑھانے میں سفیر ترمذی کی کوششوں کو سراہا۔ انہوں نے ابوظہبی فنڈ فار ڈویلپمنٹ کے ان منصوبوں کی حمایت جاری رکھنے کے عزم کا اعادہ کیا جو پاکستان کی پائیدار ترقی اور خوشحالی میں معاون ہیں۔دونوں فریقوں نے مشترکہ اقدار، باہمی احترام اور تعاون پر مبنی دونوں برادر ممالک کے درمیان پائیدار اور کثیر جہتی شراکت داری کو تسلیم کیا۔
