شان مسعود بھارت کے خلاف میچ سے قبل کھل کر سامنے آگئے
ڈربی شائر کے کپتان شان مسعود کا بھارت کے خلاف میچ سے قبل کہنا ہے کہ روایتی حریفوں کے خلاف میدان میں اترنا ہر پاکستانی کرکٹر کا خواب ہوتا ہے لیکن میرے لیے یہ صرف ایک کرکٹ میچ ہے۔
بھارت کے خلاف وارم اپ میچ سے قبل ڈربی شائر کے کپتان شان مسعود کا کہنا تھا کہ میں جانتا ہوں کہ پاک بھارت دشمنی بہت اہمیت کی حامل ہے۔
انہوں نے کہا کہ بھارت کے خلاف کھیلنا ہر پاکستانی کھلاڑی کے لیے ایک بڑا لمحہ ہوتا ہے لیکن آخرکار یہ ایک کرکٹ میچ ہے اور میرے لیے بڑا موقع ہے۔
واضح رہے کہ بھارت کے لیے یہ وارم اپ میچ انگلینڈ کے خلاف وائٹ بال سیریز سے قبل تیاریوں کا حصہ ہے جبکہ بھارت انگلینڈ کے دورے کے دوران تین ون ڈے اور ٹی ٹوئنٹی میچز کھیلے گا۔
Advertisement
ملتان سلطانز کے سابق کپتان کا بھارت کے اسکواڈ کے بارے میں بات کرتے ہوئے کہنا تھا کہ بھارت کے پاس ایک ناقابل یقین ٹیم ہے اور وہ فی الحال ریڈ بال اور وائٹ بال کی الگ الگ ٹیموں کے ساتھ انگلینڈ کا دورہ کررہے ہیں جس وجہ سے ان کے پاس بہت زیادہ ٹیلنٹڈ اور عالمی معیار کے کھلاڑی ہیں۔
شان مسعود کا کہنا تھا کہ چونکہ بھارت کی ٹیم میں متعدد عالمی معیار کے کھلاڑی موجود ہیں جس وجہ سے ان کے پاس خود کو بہترکھلاڑی ثابت کرنے کا یہ ایک بڑا موقع ہوگا۔
ان کا کہنا تھا کہ بطور کھلاڑی میں اس میچ کو ایک موقع کے طور پر دیکھتا ہوں کیونکہ اس میں مجھے کچھ ٹاپ کھلاڑیوں کے ساتھ کھیلنے کا موقع ملے گا جو میری کرکٹ کو بڑھانے میں مددگار ثابت ہوگا۔
دباؤ کے بارے میں سوال کا جواب دیتے ہوئے شان مسعود نے کہا کہ یہ کرکٹ کا ایک کھیل ہے جس میں وہ زیادہ سے زیادہ رنز بنانے کی پوری کوشش کریں گے۔