جنگ زدہ اور تباہی کے شکار ملک یوکرین کی بحالی کے لیے سوئٹزر لیںڈ کے شہر لوگانو میں دو روزہ یوکرین ریکوری کانفرنس جاری ہے۔ اس موقع پر یوکرین حکومت کی جانب سے قومی بحالی کا ایک مجوزہ پروگرام بھی پیش کیا گیا ہے جس کے لیے ساڑھے سات سو بلین ڈالر کے اخراجات کا تخمینہ لگایا گیا ہے۔
یوکرین کے صدر ولودیمیر زیلنسکی نے کہا ہے کہ ان کے جنگ سے تباہ شدہ ملک کی تعمیر نو اور بحالی پوری جمہوری دنیا کا مشترکہ فریضہ ہونا چاہیے۔ انہوں نے یہ بات سوئٹزرلینڈ کے شہر لوگانو میں یوکرین کی تعمیر نو کے لیے چالیس سے زائد ممالک اور بین الاقوامی اداروں کے دو روزہ مشاورتی اجلاس سے اپنے وڈیو خطاب میں کہی۔
اس موقع یوکرینی وزیراعظم نے جنگ کے خاتمے کے بعد یوکرین کی تعمیر نو کے لیے ایک ایسا پروگرام بھی پیش کیا جس کی مالیت ساڑھے سات سو بلین ڈالر بنتی ہے۔ یوکرین ریکوری کانفرنس کے نام سے اس مشاورت کا مقصد اس مشرقی یورپی ملک کے لیے اسی طرح کے ایک بحالی پروگرام کو ممکن بنانا تھا جیسا دوسری عالمی جنگ کے بعد یورپ کی تعمیر نو کے لیے مارشل پلان کے نام سے متعارف کرایا گیا تھا۔
Advertisement