برہان وانی کی شہادت سے اب تک 1697 کشمیری شہید
مقبوضہ کشمیر: برہان وانی کی شہادت سے اب تک مقبوضہ علاقے میں 1697 کشمیریوں کو شہید کیا جاچکا ہے۔
کشمیر میڈیا سروس کی رپورٹ کے مطابق بھارت کے غیر قانونی زیرِ قبضہ جموں وکشمیر میں بھارتی فوجیوں نے 8 جولائی 2016 کو معروف نوجوان رہنما برہان مظفر وانی کی شہادت کے بعد سے اب تک 1697 کشمیری کو شہید کیا جاچکا ہے جن میں 37 خواتین اور 122 کم عمر لڑکے شامل ہیں۔
کشمیر میڈیا سروس کے شعبہ تحقیق کی طرف سے جاری اعداد و شمار کے مطابق ان شہید میں سے 189 افراد کو جعلی مقابلوں یا حراست کے دوران شہید کیا گیا ہے۔
رپورٹ میں کہا گیا ہے کہ اس عرصے کے دوران بھارتی فوجیوں، پیرا ملٹری اور پولیس اہلکاروں کی طرف سے مقبوضہ علاقے میں پر امن مظاہرین پر گولیوں، بیلٹ گنز اورآنسوں و پاوا گیس کے گولوں کے وحشیانہ استعمال کی وجہ سے 29 ہزار892 افراد شدید زخمی ہوئے ہیں۔
Advertisement
کے ایم ایس رپورٹ میں دیے گئے اعداد و شمار میں کہا گیا کہ کل جماعتی حریت کانفرنس کے چیئرمین مسرت عالم بٹ، شبیر احمد شاہ، محمد یاسین ملک، آسیہ اندرابی، فہمیدہ صوفی، ناہیدہ نسرین، نعیم احمد خان، ایاز اکبر، الطاف احمد شاہ، پیر سیف اللہ، راجہ معراج الدین کلوال، فاروق احمد ڈار اور شاہد الاسلام مقبوضہ اور بھارتی جیلوں میں نظر بند ہیں۔
علاوہ ازیں غلام احمد گلزار، مشتاق الاسلام، رفیق احمد گنائی، محمد یوسف میر، محمد یوسف فلاحی، محمد حیات بٹ، غلام محمدبٹ سید شاہد یوسف ، سید شکیل یوسف ، انجینئر رشید احمد ، انسانی حقوق کے علمبردار خرم پرویز، احسن انتو، اورصحافی آصف سلطان اور فہد شاہ سمیت ہزاروں کشمیری بھی مقبوضہ اور بھارتی جیلوں میں نظر بند ہیں۔