وسیم اکرم نے 1996 کے ورلڈکپ میں بھارت کے خلاف اہم میچ نہ کھیلنے کی وجہ بتادی

By admin On اکتوبر 19, 2022

وسیم اکرم انجری کے باعث 1996 کے ورلڈ کپ میں بھارت کے خلاف کوارٹر فائنل میچ نہیں کھیل سکے تھے۔

1996 میں بنگلورو کے ایم چنا سوامی اسٹیڈیم میں ورلڈ کپ کا کوارٹر فائنل میچ پاکستان اور بھارت کی ٹیموں کے درمیان کھیلا گیا تھا جس میں بھارت نے پاکستان کو 39 رنز سے شکست دی تھی۔

اس میچ میں پاکستان کرکٹ ٹیم کے سابق کپتان وسیم اکرم نہیں کھیلے تھے جس پر ان سے کئی مرتبہ سوالات بھی ہوئے ہیں جب کہ اس حوالے سے مختلف قسم کی باتیں بھی سامنے آتی رہی ہیں۔

وسیم اکرم بہت پرسکون کھلاڑی ہیں لیکن اس مرتبہ سوال پوچھنے پر وہ غصے میں آگئے اور کہا کہ یہ بات انہیں بہت تکلیف دیتی ہے۔

ان کا کہنا تھا کہ میں نے کئی مرتبہ نوجوانوں سے کہا ہے کہ وہ افواہوں پر یقین نہ کریں کیونکہ اس وقت آپ میں سے بہت سے لوگ پیدا بھی نہیں ہوئے تھے، جب کوئی پاکستانی مجھ سے اس بارے میں پوچھتا ہے تو یہ بہت ہی شرمناک بات ہوتی ہے۔

انہوں نے بتایا کہ ’میں میچ سے تین دن قبل زخمی ہوگیا تھا۔ نیوزی لینڈ کے خلاف میں نے 34 رنز اسکور کیے تھے، جب میں ڈین نیش کی گیند پر سوئپ کرنے لگا تو فائن ٹانگ اوپر کی جانب آگئی جس کی وجہ سے وہ زخمی ہوگئے‘۔

انہوں نے یہ بھی بتایا کہ میرے سینے میں تناؤ پیدا ہوگیا تھا جسے ٹھیک ہونے میں چھ ہفتے لگے، وقار یونس یہاں بیٹھے ہیں، ہم نے اس وقت جان بوجھ کر پریس کو نہیں بتایا تاکہ بھارت کو علم نہ ہو کہ ہمارا اہم کھلاڑی زخمی ہے۔

وسیم اکرم کہتے ہیں کہ وقار یونس نے صبح خود دیکھا تھا کہ میں نے درد سے نجات حاصل کرنے کے لیے چھ درد کش انجیکشن لگوائے تھے لیکن ان سے بھی کام نہیں بنا تھا۔

واضح رہے کہ اس میچ میں وسیم اکرم کی جگہ عطاء الرحمان کو ٹیم میں شامل کیا گیا تھا، جنہوں نے بھارت کے خلاف عمدہ بولنگ کا مظاہرہ کیا تھا۔