اسلام آباد(نیوزڈیسک)اب متحدہ عرب امارات کا ویزا لینے کا طریقہ بھی سعودی طرز پر ہو گا پہلے آن لائن ویزہ نکلے گاپھر پاکستان میں ویزہ سنٹر جا کر ویزہ سٹیکر لگوانا پڑے گا۔

اس حوالے سے متحدہ عرب امارات کے سفارتخانہ نے ویزا لینے کے خواہشمند افراد کے لیے معلومات جاری کر دیں۔

متحدہ عرب امارات کے سفارتخانے کے ترجمان کے مطابق سب درخواست دہندگان کے لیے ویزا پراسیس فیس 69 امریکی ڈالرز فی کس ہوگی اور سوائے ملازمت ویزا کے تمام ویزوں بشمول وزٹ، سیاحتی و فیملی ویزا کے لیے درخواست دہندہ خود آن لائن اپلائی کرے گا۔

ترجمان نے کہا کہ ویزا اپلائی کرنے کے بعد درخواست دہندہ کو سفارت خانہ/ ویزا سینٹر طلب کرنے کا نوٹیفکیشن بھیجا جائے گا۔

درخواست دہندہ کو کن باتوں کا خیال رکھنا ہوگا؟

درخواست دہندہ کو مندرجہ ذیل ہدایات کا خیال رکھنا ہوگا۔

-درخواست دہندہ کو ویزا درخواست دستاویز کا ثبوت ساتھ رکھنا ہو گا۔

-درخواست دہندہ کو اپنے/ والدین/ سپانسر کی گذشتہ 6 ماہ کی دستخط/مہر شدہ بینک اسٹیٹمینٹ ساتھ رکھنا ہو گا۔

– 5 ہزار امریکی ڈالرز یا اسکے مساوی رقم کی بینک سٹیٹمنٹ ہونا ضروری ہے۔

-ہوٹل ریزرویشن، گھر اور احباب یا رشتہ دار کے گھر کی دستاویز ساتھ لانا ہوگی۔

-سفارت خانے یا ویزا سینٹر آتے ہوئے کنفرم ریٹرن ایئر ٹکٹ ساتھ لانا ہو گا۔

-اصلی قومی شناختی کارڈ یا پاسپورٹ ساتھ لانا ہو گا۔

-اصلی قومی شناختی کارڈ یا پاسپورٹ کا کم از کم 6 ماہ کے لیے ویلڈ ہونا ضروری ہے۔

-69 امریکی ڈالرز فی ویزا درخواست مخصوص الفلاح بنک اکاؤنٹ میں جمع کرانا ضروری ہو گا۔

-جمع شدہ ویزا فیس کی اصلی رسید سفارت خانہ یا ویزا سینٹر آتے ہوئے ساتھ لانا لازمی ہے۔

5 برس سے کم عمر بچوں کے لیے ویزا سینٹر آنا ضروری نہیں ہے بلکہ ان کے لیے صرف سفید بیک گراؤنڈ کے ساتھ پاسپورٹ سائز تصویر ضروری ہو گی لیکن تصویر میں دھوپ والے چشمے نہ پہنے ہوئے ہوں۔

5 برس سے کم عمر بچوں کے لیے ضروری ہوگا کہ وہ تصویر میں مناسب انداز میں بیٹھے ہوئے ہوں۔

6 تا 15 برس کے بچوں کے لیے تصویر ساتھ لانے کی ضرورت نہیں ہے ان کی تصویر ویزا سینٹر میں ہی لی جائے گی۔

15 برس یا اس سے زائد عمر کے افراد کا ویزا سینٹر آنا ضروری ہو گا۔15 برس یا اس سے زائد عمر کے افراد کآ سارا پراسیس بالغ افراد کی طرح ویزا سینٹر میں ہی ہو گا۔

اسلام آباد کے ویزا مرکز جانے کے لیۓ شٹل سروس 1500 روپیہ ایک دفعہ کا وصول کرے گی۔

براہ کرم تمام کاغذات کی فوٹو کاپی ساتھ لیکر جائیں ورنہ 50 روپیہ فی کاپی اداکرناپڑیں گے-مندرجہ بالا دستاویز مکمل کرنے کے بعد 5 برس اور اس سے بڑی عمر کے افراد ویزا سینٹر کا دورہ کریں گے جہاں ان کا بائیو میٹرک اور ویزا پراسیس مکمل کیا جائے گا۔