سری لنکن کپتان نے پاکستان ٹیم کو آسٹریلیا سے زیادہ خطرناک قرار دے دیا
سری لنکا کے کپتان دیموتھ کرونارتنے نے پاکستان ٹیم کو آسٹریلوی ٹیم سے زیادہ خطرناک قرار دے دیا ہے۔
سری لنکن کرکٹ ٹیم کے کپتان دیموتھ کرونارتنے کا کہنا ہے کہ آسٹریلیا کے خلاف ٹیسٹ سیریز میں دنیش چندیمل کی ڈبل سنچری پاکستان کے خلاف سخت چیلنج سے قبل ایک اچھی علامت ہے۔
یاد رہے کہ دنیش چندیمل کے 206 کی بدولت سری لنکا نے آسٹریلیا کے خلاف گال میں ہونے والے دوسرے ٹیسٹ میچ میں ایک اننگ اور 39 رنز سے کامیابی اپنے نام کرکے سیریز 1-1 سے برابر کردی تھی۔
سری لنکن ٹیم میں ڈٰیبیو کرنے والے اسپنر پربھات جے سوریا نے دوسرے ٹیسٹ میچ میں 11 وکٹیں حاصل کرکے آسٹریلیا کو چوتھے دن کے میچ کے آخری سیشن میں 151 رنز پر ڈھیر کردیا تھا۔
آسٹریلیا نے اپنی پہلی اننگ میں 364 رنز بنائے تھے جس کے جواب میں سری لنکا نے دنیش چندیمل کی ناقابل شکست اننگز کی بدولت 554 رنز اسکور کردیے تھے۔
Advertisement
سری لنکن کپتان کا کہنا تھا کہ جب کوئی سینئر کھلاڑی اس طرح کی اننگز کھیلتا ہے تو بطور کپتان میرے لیے چیزیں آسان ہوجاتی ہیں۔
ان کا کہنا تھا کہ اینجلو میتھیوز فیل ہوسکتے ہیں، میں فیل ہوسکتا ہوں لیکن میں جانتا ہوں کوئی ہمارے لیے لڑے گا جوکہ آگے آنے والی سیریز کے لیے اچھی علامت ہے۔
واضح رہے کہ پاکستان کرکٹ ٹیم پہلے ہی سری لنکا پہنچ چکی ہے، جہاں وہ پریکٹس میچ میں مصروف ہے جبکہ ہفتے سے دونوں ٹیموں کے درمیان گال ٹیسٹ کا آغاز ہوگا۔
پاکستان ٹیم پر بات کرتے ہوئے سری لنکن کپتان کا کہنا تھا پاکستان ٹیم آسٹریلیا سے زیادہ خطرناک ثابت ہوگی کیونکہ یہ ٹیم اسپنرز کو بہتر طریقے سے کھیلنے کی صلاحیت رکھتی ہے۔
کرونارتنے کا کہنا تھا کہ پاکستان ٹیم ایک مضبوط اور شاندار ٹیم ہے جوکہ آسٹریلیا سے زیادہ چیلنجنگ ہوگی۔
خیال رہے کہ پاکستان ٹیم کے کپتان بابر اعظم اس وقت فارم میں ہیں جبکہ امام الحق بھی رنز بنانے والوں میں شامل ہیں۔
علاوہ ازیں پاکستان ٹیم میں تجربہ کار اسپنر یاسر شاہ کی واپسی ہوئی جس کے بعد پاکستان کا باؤلنگ اٹیک بھی اب پہلے سے زیادہ بہتر ہوگیا ہے۔