انگلینڈ نے پاکستان اور بھارت کو ٹیسٹ سیریز کی میزبانی کی پیشکش کردی

By admin On ستمبر 27, 2022

پڑوسی ممالک پاکستان اور بھارت کے درمیان سیاسی تناؤ کی وجہ سے دونوں ملکوں کی ٹیمیں 2007 کے بعد سے ٹیسٹ سیریز میں آمنے سامنے نہیں آئی ہیں۔

غیر ملکی خبر رساں ادارے کے مطابق اب انگلینڈ نے مستقبل میں پاک بھارت ٹیسٹ سیریز کے لیے غیر جانبدار میزبان بننے کی پیشکش کردی ہے۔

ای سی بی کے ڈپٹی چیئرمین مارٹن ڈارلو نے پاکستان میں جاری ٹی ٹوئنٹی سیریز کے دوران پی سی بی سے بات کی۔

اس دوران انہوں نے مستقبل میں پاکستان اور بھارت کے درمیان ممکنہ تین ٹیسٹ میچز کی سیریز کے لیے ممکنہ مقامات کی بھی پیشکش کی ہے۔

دونوں ممالک آئی سی سی اور ایشین ایونٹس میں باقاعدگی سے کھیلتے رہے ہیں جب کہ رپورٹس ہیں کہ بھارت اس تجویز کو قبول کرسکتا ہے کیونکہ ان کے لیے غیر جانبدار میدان پر پاکستان سے کھیلنا سیاسی طور پر زیادہ قابل قبول ہوگا۔

دوسری جانب یہ بھی رپورٹس ہیں کہ پی سی بی بھارت سے غیر جانبدار مقام پر کھیلنے کے لیے رضامند نہیں ہے تاہم انہوں نے ای سی بی کی پیشکش پر ان کا شکریہ ادا کیا ہے۔

واضح رہے کہ پاکستانی کھلاڑیوں کو انڈین پریمیئر لیگ (آئی پی ایل) میں بھی کھیلنے سے روک دیا گیا ہے۔

پاکستان کا کوئی بھی کھلاڑی فروری میں ہونے والی جنوبی افریقہ ٹی ٹوئنٹی لیگ میں بھی نہیں کھیل رہا ہے جس کی ایک اہم وجہ ٹیموں کے تمام مالکان کا بھارتی ہونا ہے۔

جب کہ اس اقدام سے قومی لیگز میں نجی سرمایہ کاری کے اثر و رسوخ پر بھی سوالات اٹھائے جارہے ہیں۔