بھارت کی ریاست مہاراشٹر میں عالمی وباء اومیکرون کے نئے ویرئینٹ بی اے کا پہلا مریض سامنے آ گیا ہے۔
بھارتی میڈیا کے مطابق ریاستی محکمہ صحت کے ایک اہلکار نے کل بتایا کہ مہاراشٹر میں اومیکرون کے سب ویرئینٹ کی 5 اقسام ظاہر ہوئی ہیں۔
محکمہ صحت کے اہلکار نے مزید کہا کہ ان سب میں صرف ہلکی علامات تھیں اور ان کا علاج گھر پر کیا گیا تھا۔
واضح رہے کہ اومیکرون کا نیا ویرئینٹ جنوبی افریقہ سمیت دنیا کے کچھ حصوں میں پایا گیا تھا، لیکن بھارت میں کوئی کیس سامنے نہیں آیا تھا۔
بھارتی میڈیا کے مطابق اومیکرون کی نئی اقسام کی ترتیب انسٹی ٹیوٹ آف سائنس ایجوکیشن اینڈ ریسرچ کی طرف سے کی گئی تھی، اور اس کی کھوج کی تصدیق فرید آباد میں انڈین بائیولوجیکل ڈیٹا سینٹر نے کی ہے۔
بھارتی میڈیا کی رپورٹ میں کہا گیا ہے کہ اب تک اس نئے ویرئینٹ سے متاثرہ افراد کی کل تعداد 7 ہے جن کا تعلق پونا سے ہے۔
Advertisement
مہاراشٹر کے محکمہ صحت کے مطابق متاثرہ مریض میں چار مرد اور تین خواتین شامل ہیں ، چار مریضوں کی عمر 50 سال سے زیادہ ہے، دو کی 20-40 کے درمیان ہے جبکہ ایک 9 سال کا بچہ بھی اس ویرئینٹ سے متاثر ہوا ہے۔
محکمہ صحت کے مطابق تمام 6 افراد ویکسین کو دونوں ڈوز لگوا چکے ہیں جبکہ ایک نے بوسٹر ڈوز بھی لگوائی ہے، تاہم بچے کی ویکسینیشن نہیں ہوئی۔
میڈیا رپورٹس کے مطابق تمام متاثرہ افراد میں نئے ویرئینٹ کی ہلکی علامات ہیں اور انہیں گھر پر ہی آئسولیٹ کیا گیا ہے۔
محکمہ صحت کے اہلکار کا کہنا تھا کہ مریضوں کے نمونے 4 سے 18 مئی کے درمیان لیے گئے تھے۔
اہلکار کے مطابق ان میں سے دو نے جنوبی افریقہ اور بیلجیم کا سفر کیا تھا، جب کہ تین نے کیرالہ اور کرناٹک کا سفر کیا تھا۔ انہوں نے کہا کہ دیگر دو مریضوں کی کوئی حالیہ سفری تاریخ نہیں تھی۔