پاکستان کو بھی ہاردک پانڈیا جیسے کھلاڑی کی ضرورت ہے، شاہد آفریدی

By admin On ستمبر 27, 2022

قومی ٹیم کے سابق کپتان شاہد آفریدی کا کہنا ہے کہ پاکستان ٹیم میں بھی ہاردک پانڈیا جیسے آل راؤنڈر کی ضرورت ہے۔

بھارت کے 28 سالہ کھلاڑی ہاردک پانڈیا کو وائٹ بال کرکٹ میں بہترین آل راؤنڈر قرار دیا جاتا ہے جب کہ ان کی حالیہ پرفارمنس بھی مثالی رہی ہے۔

ہاردک پانڈیا کی میچ کو ختم کرنے کی صلاحیتوں نے شاہد آفریدی کی توجہ اپنی جانب مبذول کروالی ہے۔

شاہد آفریدی کا کہنا ہے کہ پاکستان کے پاس آصف علی، خوشدل شاہ، محمد نواز اور شاداب خان جیسے کھلاڑی ضرور ہیں لیکن ان میں سے کوئی بھی اس طرح سے خود کو نہیں منواسکا جو کارنامے ہاردک پانڈیا نے انجام دیے ہیں۔

انہوں نے کہا کہ ہاردک پانڈیا جیسا میچ فنشر ہمارے پاس نہیں ہے، ہم نے سوچا تھا کہ آصف علی اور خوشدل شاہ یہ کام کرسکتے ہیں لیکن انہوں نے ایسا نہیں کیا۔

ان کا کہنا تھا کہ محمد نواز بھی اتنے مستقل مزاج نہیں ہیں اور نہ ہی شاداب ہیں، ان چار کھلاڑیوں میں سے کم از کم دو کھلاڑیوں کو مستقل مزاجی کا مظاہرہ کرنا ہوگا۔

سابق کپتان نے کہا کہ شاداب خان کی بولنگ کا وقت بہت اہم ہوتا ہے اور جس دن وہ اچھی گیند کرتے ہیں تو پاکستان میچ جیت جاتا ہے۔

شاہد آفریدی نے قومی ٹیم کو مشورہ دیا کہ وہ انگلینڈ کے خلاف بقیہ میچز میں آل راؤنڈر عامر جمال کو لازمی آزمائیں کیونکہ ہم جس طرح کی پچز پر اب کھیل رہے ہیں، اس میں آپ کو دو حقیقی فاسٹ بولرز اور ایک آل راؤنڈر کی ضرورت ہے۔

انہوں نے سوال کیا کہ ’ہم نے جس نئے لڑکے عامر جمال کو منتخب کیا، آپ اسے کیوں نہیں آزماتے؟ آپ انہیں آل راؤنڈر کے طور پر کھلائیں اور پھر ان سے بولنگ کروانے کے بعد بیٹنگ کرنے کو بھی کہیں پھر آُپ کو معلوم ہوجائے گا کہ وہ کس قسم کا کرکٹر ہے‘۔

شاہد آفریدی نے زور دیتے ہوئے کہا کہ پاکستان کو ٹی ٹوئنٹی ورلڈ کپ سے قبل اپنی غلطیوں کو سدھارنے کی ضرورت ہے۔

انہوں نے مزید کہا کہ ‘اگر پاکستان ٹیم ورلڈ کپ جیتنے کا خواب دیکھ رہی ہے تو انہیں اپنی بولنگ اور بیٹنگ پر بہت کام کرنے کی ضرورت ہے جب کہ انہیں ان غلطیوں کو بھی کم کرنے کی ضرورت ہے جو گزشتہ چند میچز میں وہ کرتے آئے ہیں‘۔